ნიკა გვარამიას უფლებადამცველს საქალაქო სასამართლოს განჩინება ჩაბარდა. კანონმდებლობის მიხედვით, ადვოკატს მოსამართლის დადგენილების სააპელაციოში გასასაჩივრებლად 48 საათი აქვს.
დიმიტრი საძაგლიშვილი პროცედურულად არსებულ არაერთ შეუსაბამობაზე ამახვილებს ყურადღებას. გარდა ამისა, ადვოკატი ამტკიცებს, რომ გვარამიას ბრალი პროკურატურამ ისე წარუდგინა, რომ მას საქმის მასალები შესწავლილი არ ჰქონდა.
სასამართლომ "რუსთავი2"-ის ყოფილ გენერალურ დირექტორს 40-ათასლარიანი გირაო შეუფარდა და დამატებითი აკრძალვებიც დაუწესა. გვარამიას ქვეყნის დატოვება ეკრძალება. "რუსთავი2"-ის ყოფილი გენერალური დირექტორი ამბობს, რომ მის წინააღმდეგ წარმოებული საქმე აბსურდულია, სწორედ ამიტომ, გირაოს გადახდას არ აპირებს.
მოსამართლე გიორგი კერატიშვილის გადაწყვეტილებით, ნიკა გვარამიამ გირაო ერთი თვის ვადაში უნდა გადაიხადოს.
ნიკა გვარამიას ბრალი სისხლის სამართლის კოდექსის 220-ე მუხლით აქვს წაყენებული, რაც საწარმოს ხელმძღვანელობითი და წარმომადგენლობითი უფლებამოსილების გამოყენებას, ამ ორგანიზაციის კანონიერი ინტერესების საწინააღმდეგოდ მოქმედებას გულისხმობს, რამაც მნიშვნელოვანი ზიანი გამოიწვია.
