პროკურატურა აღკვეთის ღონისძიების სახით გირაოს 80 ათას ლარს ითხოვს, - ამის შესახებ რუსთავი 2-ის ტოფილი გენერალური დირექტორი ნიკა გვარამია ფეისბუკში წერს. პროცესი თბილისის საქალაქო სასამართლოში 20:00 საათზეა ჩანიშნული.
გენერალურმა პროკურატურამ „რუსთავი 2-ის" ყოფილი გენერალური დირექტორის, ნიკა გვარამიას საქმეზე თბილისის საქალაქო სასამართლოს აღკვეთის ღონისძიების შეფარდების შუამდგომლობით მიმართა.
შეგახსენებთ, რომ „რუსთავი 2-ის" ყოფილ გენერალურ დირექტორს, ნიკა გვარამიას გენერალურმა პროკურატურამ ბრალი 9 აგვისტოს წარუდგინა. საგამოძიებო უწყების ინფორმაციით, გამოტანილია დადგენილება ნიკა გვარამიას ბრალდების შესახებ, საქართველოს სისხლის სამართლის კოდექსის 220-ე მუხლით გათვალისწინებული დანაშაულის ჩადენისათვის, რაც გულისხმობს საწარმოში ხელმძღვანელობითი და წარმომადგენლობითი უფლებამოსილების გამოყენებას ამ ორგანიზაციის კანონიერი ინტერესის საწინააღმდეგოდ, სხვისთვის გამორჩენის მიღების მიზნით, რამაც მნიშვნელოვანი ზიანი გამოიწვია.