მედიაში გავრცელებულ ინფორმაციასთან დაკავშირებით, რომელიც სახელმწიფო უწყებების ხელფასების და პრემიების ხარჯის მატებას ეხება შინაგან საქმეთა სამინისტრო განმარტებას აკეთებს:
„გვსურს საზოგადოებას, განვუმარტოთ, რომ შინაგან საქმეთა სამინისტრო დასაქმებული ადამიანების მხრივ არის ერთ-ერთი ყველაზე მრავალრიცხოვანი სახელმწიფო უწყება, რომელშიც ათეულობით ათასი ჩვენი მოქალაქე მუშაობს.
შინაგან საქმეთა სამინისტროს ერთ-ერთი პრიორიტეტი არის და კვლავაც იქნება სისტემაში მომუშავე რიგით პოლიციელებზე, მეხანძრე-მაშველებსა და მესაზღვრეებზე ზრუნვა, მათი სამუშაო პირობების, სოციალური დაცვის უზრუნველყოფისა და შესაძლებლობების ფარგლებში ანაზღაურების მომატების კუთხით.
სწორედ ამ მიზნით: 2018 -2019 წლებში შინაგან საქმეთა სამინისტროს 17 ათასამდე რიგით პოლიციელს, მათ შორის მესაზღვრეებს, ასევე მეხანძრე-მაშველებს ხელფასი გაეზარდა. სისტემური განახლების ფარგლებში შეიქმნა ტურისტული პატრული და დაინერგა მართლწესრიგის ოფიცრების ინსტიტუტი, რომელთა შრომის ანაზღაურების ხარჯები წინა წლების შესაბამის პერიოდებში გათვალისწინებული არ ყოფილა. ამასთან, 2019 წლის 1 იანვრიდან შინაგან საქმეთა სამინისტროს შემოუერთდა საქვეუწყებო დაწესებულება - საგანგებო სიტუაციების მართვის სამსახური. შესაბამისად მიმდინარე წელს მეხანძრე-მაშველების შრომის ანაზღაურება აისახა სამინისტროს ბიუჯეტშიც.
მთლიანობაში, ყოველივე ზემოაღნიშნულის გათვალისწინებით, მიმდინარე წელს წინა წლებთან შედარებით შრომითი ანაზღაურების ხარჯები არის გაზრდილი. ამასთან, განსაკუთრებით უნდა აღინიშნოს, რომ შინაგან საქმეთა სამინისტროს არც ერთი მაღალი თანამდებობის პირის შრომითი ანაზღაურება მიმდინარე წელს წინა წლებთან შედარებით არ გაზრდილა და სახელფასო ფონდში ამ პირთა თანამდებობრივი სარგო, პრემია, დანამატი შემცირებულია“, - აცხადებს შსს.