საქართველოს პრეზიდენტი სალომე ზურაბიშვილი საქართველოს ყოფილი პრეზიდენტის მიხეილ სააკაშვილის -IWPR-ისთვის მიცემულ ინტერვის მიკრობლოგ ტვიტერზე ეხმიანება.
„პრეზიდენტად არჩევის შემდეგ, განვაცხადე, რომ არასოდეს გავაკეთებდი კომენტარს საქართველოს ყოფილი პრეზიდენტის, მიხეილ სააკაშვილის მოსაზრებებზე, მაშინაც კი, როდესაც ის პერსონალურად ჩემთვის შეურაცხმყოფელი იყო. მაგრამ თავის ბოლო ინტერვიუში 2008 წლის ომის დროს დასავლელ პარტნიორებთან ურთიერთობებზე საუბრისას, მან გადაკვეთაა ხაზი და თავს დაესხა საქართველოს სტრატეგიულ ინტერესებს. ცალსახად ვგმობ მის მიერ გამოთქმულ მოსაზრებებს.
სააკაშვილის განცხადებები ამახინჯებს ისტორიას და შეურაცხმყოფელია ჩვენი პარტნიორი ქვეყნებისა და მათი ლიდერებისთვის, რომლებიც საქართველოს გვერდით დგანან დამოუკიდებლობის მოპოვების დღიდან.
ასეთი სიცრუე და არასწორი წარმოდგენები უპასუხისმგებლო და მიუღებელია ყოფილი პრეზიდენტის მხრიდან.
ეს არის აშკარა მცდელობა იმისა, რომ ხელი შეუშალოს ურთიერთოებებს საქართველოსა და მის ტრატეგიულ პარტნიორებს შორის ამ მნიშვნელოვან დროს, ევროკავშირისა და ნატოსკენ მიმავალ გზაზე.
ქართველი ხალხის სახელით, მე კიდევ ერთხელ გამოვხატავ ღრმა მადლიერებას ჩვენი ამერიკელი და ევროპელი პარტნიორების მიმართ, ჩვენი მუდმივი მხარდაჭერისთვის.
როგორც პრეზიდენტი, მუდამ შევეწინააღმდეგები ასეთი ტიპის თავდასხმებს, რომლებიც მიმართულია ჩვენი სტრატეგიული ურთიერთობების წინააღმდეგ“, - წერს ზურაბიშვილი.
საქართველოს ყოფილმა პრეზიდენტმა, მიხეილ სააკაშვილმა ომისა და მშვიდობის გაშუქების ინსტიტუტს (IWPR) გუშინ ინტერვიუ მისცა, სადაც 2008 წლის აგვისტოს ომზე და ჰაიდი ტალიავინის დასკვნაზე ისაუბრა.