ბათუმის ბულვარის სანაპიროზე ადაპტირებული პლაჟი გაიხსნა. ინფორმაციას ბათუმის მერია ავრცელებს.
რესტორან "ძველი გემის“ მოპირდაპირედ არსებული ლოკაცია ადაპტირდა და საპლაჟო ინფრასტრუქტურა შეზღუდული შესაძლებლობების მქონე პირთა საჭიროებებს მოერგო.
ეტლით მოსარგებლე პირებისთვის ზღვაში შესასვლელი ხუთი საცურაო ტივტივა ეტლი სსიპ "ბათუმის ბულვარმა" შეიძინა. ტივტივა ეტლით სარგებლობა მომხმარებლებისთვის უფასო იქნება.
2019 წლის ადაპტირებული ინფრასტრუქტურული პროექტის ფარგლებში, სსიპ "ბათუმის ბულვარის“ მიერ სანაპირო ზოლზე მოეწყო ადაპტირებული ბილიკი, საშხაპე-გამოსაცვლელი და საზოგადოებრივი საპირფარეშო.
პროექტი საქართველოში პირველად ხორციელდება და ინკლუზიური ტურიზმის განვითარებასა და შშმ პირთა თანაბარ ხელმისაწვდომობას ემსახურება.
ღონისძიებას ბათუმის მერი ლაშა კომახიძე, ადგილობრივი ხელისუფლებისა და არასამთავრობო ორგანიზაციების წარმომადგენლები დაესწრნენ.
აღნიშნული პროექტის მთავარი გზავნილია #ზღვაყველასია