9 აგვისტოს, 11 საათზე, სოციალური პასუხისმგებლობის ფარგლებში, ბულვარის სანაპიროზე წლის ყველაზე მნიშვნელოვანი პროექტის - ადაპტირებული პლაჟის გახსნის ღონისძიება გაიმართება!
ღონისძიებას დაესწრებიან საზოგადოებრივი ორგანიზაცია - „კოალიცია დამოუკიდებელი ცხოვრებისათვის“ თავმჯდომარე გიორგი ძნელაძე, ორგანიზაცია „ცვლილებები თანაბარი უფლებებისთვის“ ხელმძღვანელი თომა კაკაბაძე, სამთავრობო და არასამთავრობო უწყების წარმომადგენლები.
მიმდინარე წლის ტურისტული სეზონისათვის ბათუმის ბულვარის სანაპიროზე რესტორან „ძველი გემი“-ს მოპირდაპირე მხარეს ერთი ლოკაცია სრულად გახდა ადაპტირებული და საპლაჟო ინფრასტრუქტურა შეზღუდული შესაძლებლობების მქონე პირთა საჭიროებებს მოერგო. აღნიშნული პროექტის მთავარი გზავნილია #ზღვაყველასია!
წელს, პირველად შეზღუდული შესაძლებლობების მქონე პირები ზღვაში დამოუკიდებლად შეძლებენ შესვლას. ბათუმის ბულვარმა ეტლით მოსარგებლე პირებისთვის ზღვაში შესასვლელი ხუთი საცურაო ტივტივა ეტლის შეძენაზე იზრუნა. ტივტივა ეტლით სარგებლობა მომხმარებლებისთვის უფასო იქნება.
2019 წლის ადაპტირებული ინფრასტრუქტურული პროექტის ფარგლებში, სანაპირო ზოლზე მოეწყო ადაპტირებული ბილიკი, საშხაპე- გამოსაცვლელი და საზოგადოებრივი საპირფარეშო. თანამედროვე მულტი-ფუნქციური ადაპტირებული საპირფარეშო აღჭურვილია ულტრა თანამედროვე თვითმწმენდი ტექნოლოგიებით, სადაც განთავსებული არის ანტიბაქტერიული ბავშვთა გამოსაცვლელი კუთხე და ანტივანდალური ინვენტარი. დამატებით, ბათუმის ბულვარში სანაპირო ზოლის გასწვრივ სამ ლოკაციაზე, ექვსი საზოგადოებრივი დანიშნულების საპირფარეშო იფუნქციონირებს.
აღნიშნული პროექტი საქართველოში პირველად ხორციელდება, რომელიც ინკლუზიური ტურიზმის განვითარებასა და შშმ პირთა თანაბარ ხელმისაწვდომობას ემსახურება. ადაპტირებულ ინფრასტრუქტურულ პროექტს სსიპ “ბათუმის ბულვარი“ ახორციელებს.
