„ჩემი სახლიდან 6 კილომეტრში ბაღია, ჩემი გაშენებული ბაღი. დიდი ხანია, იქ არ ვყოფილვარ, არ შემეძლო... ჩემი დიდი პრობლემა ჰაერის უკმარისობით დაიწყო. არც მე აღმოვჩნდი გამონაკლისი და სხვა პაციენტებივით კლინიკიდან კლინიკაში ბევრი ვიხეტიალე, ვიდრე ლევან ქარაზანიშვილი გავიცანი. გამიმართლა და მერე როგორ! ვამბობ ხოლმე, რომ სიცოცხლის 69 წელიწადი უფალმა მაჩუქა, ის წლები კი, რომლებიც წინ მელოდება, ბატონი ლევანის დამსახურებაა. მან გულზე ხუთი სხვადასხვა დაზიანების ერთდროული კორექცია ჩამიტარა. იმდენად მეშინოდა სიკვდილის, რომ ამაზე საუბარი ახლაც კი მიჭირს. შემდეგ კი ჩემს ექიმს ვენდე. მართლა მეორედ დავიბადე, მუდმივად ჰაერის უკმარისობის შეგრძნება და ტკივილის გამოცდილება დამეხმარა გამეცნობიერებინა, რამდენად ძვირფასია თითოეული წამი. ახლა ყოველ ახალ დღეს ვეფერები, ვტკბები და ცხოვრების ხალისს ვიქმნი. დღეს ბედნიერი ვარ და მოუთმენლად ველი შეხვედრას ჩემს ლამაზ ბაღთან. ალბათ, როგორი მიტოვებულია...“ - ეთერ კვიკვინია, პაციენტი.
„გულის ხუთი სხვადასხვა დაზიანების ერთდროული კორექცია მარტივი ნამდვილად არ არის. თავდაპირველად, პაციენტმა ჩვენს კლინიკას ამბულატორიულად მომართა. დიაგნოზის გამოვლენის შემდეგ დაიგეგმა ურთულესი ოპერაცია და მომზადდა პაციენტი. 2019 წლის 18 თებერვალს მას გულის ხუთი სხვადასხვა დაზიანების ერთდროული კორექცია ჩაუტარდა. ოპერაციული და მედიკამენტური მკურნალობის შემდეგ პაციენტი შვიდ დღეში სახლში სტაბილურ მდგომარეობაში გაეწერა. ის კარდიოლოგის მუდმივ მეთვალყურეობას საჭიროებს მონიტორინგის მიზნით, თუმცა მის სიცოცხლეს საფრთხე ამიერიდან არ ემუქრება“,- ლევან ქარაზანიშვილი, ივანე ბოკერიას ჰოსპიტლის კარდიოქირურგიული დეპარტამენტის ხელმძღვანელი.
