“იოშე ყაზბეგს“ სტეფანწმინდაში 2 მცირე სასტუმრო აქვთ - 5 და 8 ნომრიანი. კომპანია არ არის ერთადერთი ყაზბეგის მუნიციპალიტეტში, რომელსაც რუსეთიდან ტურისტების შემცირებამ მნიშვნელოვანი ფინანსური ზარალი მიაყენა. „იოშე ყაზბეგის“ სასტუმროებში რუსეთიდან ჯავშნები გაუქმდა არა მხოლოდ ივლისის, არამედ მომდევნო თვეებზეც.
კომპანიის ხელმძღვანელი მარი ბერიშვილი აცხადებს, რომ რუსეთიდან ფრენების შეჩერებამ ამ ქვეყნიდან ჯავშნების რაოდენობის შემცირების პროცესს დაუდო სათავე. მისი თქმით, შემოვლითი გზით საქართველოში ჩამოსვლა ბევრ ტურისტს ხარჯებს მნიშვნელოვნად უძვირებს, ამასთან ისინი მგზავრობაში დაგეგმილზე ბევრად დიდ დროს ატარებენ, რის გამოც ისინი იძულებულნი არიან, საკუთარ გეგმებს გადახედონ.
მარი ბერიშვილის განცხადებით, სექტემბერში სასტუმროები რუსეთიდან ტურისტების იმედად იყვნენ. მისი თქმით, ჯავშნების გაუქმების გამო კომპანია სხვა ტურისტულ ბაზრებზე გასვლის შესაძლებლობას ეძებს. „ყაზბეგში სხვა სასტუმროებსაც მოაკლდათ ტურისტები. თუკი შარშან ამ დროს სასტუმროები თითქმის სრულად იყო დატვირთული, წელს ასე არ არის. რა იქნება შემოდგომას, წინასწარ პროგნოზს ვერ გავაკეთებ,“ - განაცხადა “იოშე ყაზბეგის“ მეპატრონემ.