ნატოს გენერალური მდივანი იენს სტოლტენბერგი ეხმიანება აშშ-ის მიერ საშუალო და მცირე მანძილზე მოქმედების რაკეტების ლიკვიდაციის შესახებ შეთანხმების დატოვებას, რითაც შეთანხმებას ოფიციალურად შეწყვიტა მოქმედება.
სტოლტენბერგი შეთანხმების შეწყვეტაზე მთელ პასუხისმგებლობას რუსეთის ხელისუფლებას აკისრებს.
"საშუალო და მცირე მანძილზე მოქმედების რაკეტების ლიკვიდაციის შესახებ შეთანხმებამ დღეს არსებობა შეწყვიტა. ხელშეკრულების გაუქმებაზე პასუხისმგებლობა მხოლოდ რუსეთს ეკისრება. ნატო მთელი პასუხისმგებლობით გააგრძლებს შეკავების პოლიტიკისა და თავდაცვის უზრუნველყოფის ღონისძიებების განხორციელებას“, - წერს იენს სტოლტენბერგი მიკრობლოგ „ტვიტერზე“.
2019 წლის ორი აგვისტოდან შეწყდა საბჭოთა კავშირსა და შეერთებულ შტატებს შორის დადებული შეთანხმება, საშუალო და მცირე მანძილზე მოქმედი რაკეტების ლიკვიდაციის შესახებ. შეთანხმებას ხელი 1987 წლის 8 დეკემბერს მოეწერა.
ვაშინგტონმა მანამდე განაცხადა, რომ შეთანხმებას დატოვებდა რუსეთის მხრიდან არსებული დარღვევების გამო.
დოკუმენტის თანახმად 500-დან 5 ათასამდე კმ-ის მანძილზე მოქმედი რაკეტები აკრძალულად იყო გამოცხადებული. თუმცა აშშ-მა და ნატო-მ მოსკოვი შეთანხმების დარღვევაში არაერთხელ დაადანაშაულა.
შეთანხმების შეწყვეტას უაღრესად სამწუხაროს უწოდებს გაერთიანებული ერების ორგანიზაციის გენერალური მდივანი ანტონიო გუტიერეში და აცხადებს, რომ მსოფლიომ დაკარგა ბირთვული იარაღის გამოყენების შემაკავებელი ძლიერი ინსტრუმენტი.
