ზაზა ოქუაშვილს ნამდვილად ველაპარაკე და ის აპირებს ახალი არხის დაფინანსებაში მონაწილეობას, - განაცხადა რუსთავი 2-ის ყოფილმა გენერალურმა დირექტორმა, ნიკა გვარამიამ პარლამენტთან მიმდინარე გადაცემაში "სირცხვილია".
მისი თქმით, მას არ მაქვს იმის ფუფუნება, რომ ჰყავდეს ისეთი დამფინანსებელი, როგორიც მეორე შემთხვევაშია. ნიკა გვარმია დავით კეზერაშვილს გულისხმობდა, რომელმაც დღეს განაცხადა, რომ ის საქართველოში ახალი ტელევიზიის დაფუძნებას აპირებს.
"ფული მოდის ბევრი მხრიდან, მე ვმუშაობ ფანდრაიზინგზე. სამწუხაროდ, მე არ მაქვს ფუფუნება, რომ მყავდეს ისეთი დამფინანსებელი, როგორიც მეორე შემთხვევაშია, წინააღმდეგ შემთხვევაში, ბევრად სწრაფად გავაკეთებდი ამ ყველაფერს. ვმუშაობ ბევრი მიმართულებით. ყველასთან დავილაპარაკებ, მიხეილ სააკაშვილით დაწყებული, ზაზა ოქუაშვილით გაგრძელებული. სხვათა შორის, ზაზა ოქუაშვილს ნამდვილად ველაპარაკე და ის აპირებს ამაში მონაწილეობის მიღებას.
ყველა ადამიანს დაველაპარაკები, ვინც ებრძვის საქართველოში დიქტატურას და მივიღებ მათგან ფულს, გავაკეთებ საქვეყნო საქმეს, იმ საქმეს, რასაც ჰქვია ბიძინა ივანიშვილის წასვლა. მე არ მრცხვენია არავისთან ლაპარაკი, მიხეილ სააკაშვილთან მით უმეტეს. სააკაშვილის შეცდომები განსახილველია, მაგრამ მე ვთვლი, სააკაშვილი თანამედროვე საქართველოს დამფუძნებელია და მასთან ლაპარაკი სასირცხვილო ჩემთვის არ არის", - თქვა გვარამიამ.
ფოტო: Reuters
