79 წლის ამერიკელ ქალს უამრავი კატის მოვლა-პატრონობის გამო 10-დღიანი პატიმრობა მიესაჯა,- ამის შესახებ BBC-ი წერს.

ოჰაიოს შტატში მცხოვრები ნენსი სეგულა აცხადებს, რომ მის სახლთან უამრავი მიტოვებული კატა იყრის თავს, ის კი მათ საკვებს აძლევს. ქალბატონი გაბრაზებულია და უსუსური ცხოველების მოვლის გამო პატიმრობას, თუნდაც 10-დღიანს შეურაცხყოფად იღებს.

2015 წლიდან დღემდე, 79 წლის ნენსი სეგულას მეზობლებმა 4-ჯერ უჩივლეს. ისინი სეგულას სახლის ტერიტორიაზე ათეულობით კატის ყოფნას აპროტესტებენ.

პოლიციის მონაცემებით, სეგულას სახელზე 4 ჩანაწერი მოიპოვება.

2015 წელს მას ბრალი ედებოდა შტატის 505-ე კანონის დარღვევაში, რაც ქუჩაში მყოფი შინაური ცხოველების გამოკვებას გულისხმობს.

2017 წელს ამავე ბრალდებით ფაქტზე დაიჭირეს, რა დროსაც ის ათეულობით ქუჩის კატას აჭმევდა.

2017 წელს მას საზოგადოებისთვის სასარგებლო შრომა, დაშვებულზე მეტი რაოდენობის კატების ყოლის გამო დაეკისრა.

2017 წელს ქუჩაზე კატების ბუნებრივი ნარჩენების დატოვებისთვის დააჯარიმეს.

რამდენიმე დღის წინ, კი შტატის მოსამართლემ მის მიმართ 10-დღიანი პატიმრობის გადაწყვეტილება გამოიტანა.

„კატების მოყვარული ვარ. თავიდან 6-8 კატა იყო, მაგრამ ახლა მათ პატარა კნუტები დაემატა. ჩემი კატები მენატრებიან, ნაწილი დაიღუპა, ჩემი ქმარიც გარდაიცვალა. მარტოხელა და მარტოსული ვარ. ეს კატები, ჩემს სახლში და მის გარეთ, მეხმარებიან ვიყო ბედნიერი. კატები მოდიან, მე კი მათ მხოლოდ საჭმელს ვაძლევ, მე უკვე 2000 დოლარზე მეტი მაქვს ჯარიმებში გადახდილი“,- აღნიშნა FOX 8 -თან საუბარში კატების მოყვარულმა ნენსი სეგულამ.

მისი პატიმრობის 10-დღიანი ვადის ათვლა 10 აგვისტოდან დაიწყება.