ნორვეგიაში, სვალბარდის არქიპელაგზე 200-ზე მეტი ირემი დახოცილი იპოვნეს. 1978 წლის შემდეგ, რაც ამ პოპულაციის მონიტორინგი დაიწყეს, სიკვდილიანობის ეს მაჩვენებელი უდიდესია. მეცნიერთა აზრით, უბედური შემთხვევის მთავარი მიზეზი კლიმატის ცვლილებაა.
ნორვეგიის პოლარული ინსტიტუტის კვლევაში ნათქვამია, რომ ირმები გადაგვარებული ზამთრისა და შიმშილის გამო დაიხოცნენ, ხოლო ცოცხლად დარჩენილ ცხოველებს საგრძნობლად აქვთ წონა დაკლებული.
„შემაშფოთებელია ამდენი მკვდარი ცხოველის დანახვა. ეს არის შემაძრწუნებელი მაგალითი იმას, თუ როგორ ვნებს კლიმატის ცვლილება ბუნებას",- განაცხადა ნორვეგიული პოლარული ინსტიტუტის ეკოლოგმა ონვიკ პედერსენმა NRK-თან საუბარში.
სვალბარდის ირემი, არქიპელაგის ენდემური ჯიშია, რომელსაც ტუნდრას ეკოსისტემის შენარჩუნებისთვის განსაკუთრებული პასუხისმგებლობა ეკისრება.
როგორც წესი, ირემს თავისუფლად შეუძლია თოვლის გათხრა და მის ქვეშ არსებული ბალახის ჭამა. თუმცა, ყინულის ფენა შეუღწევადი აღმოჩნდა და შესაბამისად, ცხოველები შიმშილობამდე მივიდნენ.
ორგანიზაციის განცხადებით, ამ სიტუაციის გავლენა ეკოსისტემის მდგომარეობაზე, ამჟამად ბუნდოვანია, მაგრამ შეიძლება იმდენად დრამატული იყოს, რომ მრავალ სახეობას ახალ გარემო პირობებთან სწრაფად შეგუება გაუჭირდეს.