თავდაცვის ყოფილი მინისტრის, ირაკლი ოქრუაშვილის ადვოკატი თბილისის საქალაქო გადაწყვეტილებას აღკვეთის ღონისძიების სახით პატიმრობის შეფარდების შესახებ დღეს გაასაჩივრებს.
მამუკა ჭაბაშვილი სააპელაციო სასამართლოში პატიმრობის გირაოთი ან თავდებით შეცვლის შესახებ შუამდგომლობას დააყენებს.
"გავასაჩივრებთ გადაწყვეტილებას, რომელიც აბსოლუტურად დაუსაბუთებელია. კონკრეტული მტკიცებულებები, კონკრეტული არგუმენტები გვაქს და წესით და რიგით ობიექტური ნებისმიერი დამკვირვებელი დარწმუნდება იმაში, თუკი ჩახედავს საქმეს, რომ ეს ღონისძიება, პატიმრობა იყო ძალიან მძიმე, უკიდურესი და ამის საჭიროება არ არსებობდა. თუ მაინც ჩათვლის სასამართლო, რომ აღკვეთის ღონისძიების გარეშე ვერ დატოვებს და რაღაც უნდა გამოიყენოს, ალტერნატივა გირაოს სახით ან პირადი თავდებობის სახით", - ამბობს ადვოკატი.
შეგახსენებთ, რომ 20-21 ივნისის მოვლენების საქმეზე ჯგუფური ძალადობის ორგანიზებისა და მონაწილეობის ბრალდებით პარტია „გამარჯვებული საქართველოს" ლიდერი ირაკლი ოქრუაშვილი 25 ივლისს დააკავეს.
27 ივლისს პარტია „გამარჯვებული საქართველოს" ლიდერს, ირაკლი ოქრუაშვილს თბილისის საქალაქო სასამართლომ აღკვეთის ღონისძიების სახით პატიმრობა შეუფარდა. ირაკლი ოქრუაშვილს ბრალი სსსკ-ის 225-ე მუხლის პირველი და მეორე ნაწილებით წარედგინა.