ამერიკის შეერთებული შტატების უზენაესმა სასამართლო მიიღო გადაწყვეტილება, რითაც მან შტატების პრეზიდენტს, დონალდ ტრამპს ნება დართო მექსიკის საზღვართან კედლის ასაშენებლად პენგატონის ბიუჯეტიდან თანხა გამოიყენოს.
საუბარია 2,5 მლრდ დოლარზე, რომელიც დასჭირდება მექსიკასთან სამხრეთ საზღვარზე კედლის ნაწილის აშენებას.
მექსიკასა და აშშ-ს შორს გამყოფი კედლის აშენება, ტრამპის მთავარი წინასაარჩევნო დაპირება იყო.
ტრამპის ამ ინიციატივას კატეგორიულად ეწინააღმდეგებიან დემოკრატები.
უზენაესი სასამართლოს გადაწყვეტილებით, დონალდ ტრამს შეეძლება პენტაგონიდან აღებული ფულით კედლის აშენების პროექტის განხორციელება კალიფორნიაში, არიზონასა და ნიუ მექსიკოში.
აშშ-ის პრეზიდენტმა სასამართლოს გადაწყვეტილება შეაფასა, როგორც "დიდი გამარჯვება". მისი განცხადებით, კედლის აშენება ხელს შეუწყობს უკანონო მიგრაციის აღმოფხვრას, რაც თავის მხრივ, შეამცირებს კრიმინალს საზღვრის მიმდებარე ტერიტორიაზე.
დემოკრატები ამბობენ, რომ ისინი ემხრობიან საზღვრის დაცვისკენ მიმართულ ღონისძიებებს, თუმცა კედლის აშენება მეტად ძვირი და არაეფექტურია. მათივე თქმით, კედელი სიმბოლო გახდება ტრამპის ანტიიმიგრაციული პოლიტიკისა.
პრეზიდენტისა და დემოკრატების დაპირისპირება კედლის აშენებასთან დაკავშირებით, რამდენიმე თვეა გრძელდება. თებერვალში დონალდ ტრამპმა საგანგებო მდგომარეობაც კი გამოაცხადა, რათა პენტაგონის ფული გამოეყენებინა საზღვრის ასაშენებლად.