ის მოლოდინი, რომ 2020-იდან კოალიციური მთავრობა დასჭირდება ქვეყანას, არის სრულიად რეალისტური , - ეს განცხადება საქართველოს პარლამენტის თავმჯდომარის პირველმა მოადგილემ, ფრაქცია ”ქართული ოცნების” წევრმა, თამარ ჩუგოშვილმა გააკეთა.
ჩუგოშვილი პროპორციულ საარჩევნო სისტემაზე გადასვლის შემდეგ მთავრობის დაკომპლექტებაზე საუბრობს და ამბობს, რომ ვერც ერთი პოლიტიკური ძალა ცალკე ვერ შეძლებს 60 პროცენტის აღებას. შესაბამისად, 2020 წლისთვის ჩუგოშვილი კოალიციურ მთავრობას აანონსებს და ამბობს, რომ ეს მისთვის მისაღებია.
„რა რეიტინგებითაც არ უნდა სარგებლობდეს რომელიმე პოლიტიკური პარტია, ვერც ერთი პოლიტიკური პარტია საქართველოში 60-70 პროცენტს ვერ აიღებს და ასეთი უპირატესობა არ ექნება რომელიმე პოლიტიკურ ძალას. ყველა შემთხვევაში, კოალიციური მთავრობა იქნება აუცილებელი. მე გამორიცხული მგონია, რომ რომელიმე ერთმა პოლიტიკურმა ძალამ 50 პროცენტს ასე გადაამეტოს. ის მოლოდინი, რომ კოალიციური მთავრობა დასჭირდება ქვეყანას 2020-დან, არის სრულიად რეალისტური და ჩემი აზრით, კარგიც და სწორიც,“ - განაცხადა ჩუგოშვილმა.