სპეციალური დანიშნულების რაზმის წევრები ქაშუეთის ეკლესიასთან, აქციის მონაწილეების მისამართით რეზინის ტყვიებს ისვრიან. მიმდინარეობს აქციის მონაწილეების დაკავებებიც.
პარლამენტის წინ მიმდინარე აქციის დაშლისას ათეულობით მოქალაქე დაშავდა. მათ მრავლობითი დაზიანებები, რეზინის ტყვიებით აქვთ მიყენებული. ძირითადად ჭრილობები ყელისა და თავის არეში აღენიშნებათ. ამ წუთებში სპეცრაზმი წყლის ჭავლით და ცრემლსადენი გაზის მეშვეობით ტერიტორიას წმენდენ.
სპეცრაზმმა აქციის მონაწილეები წყლის ჭავლითა და რეზინის ტყვიებით დაშალა. მათ სრულად დაიკავეს რუსთაველის გამზირი. ხელისუფლებამ დამატებითი ძალები მას შემდეგ შეიყვანა, რაც აქციის დაშლის რამდენიმე მცდელობის მიუხედავად, აქციის მონაწილეები კვლავ პარლამენტის შენობასთან შეიკრიბნენ.
ცოტა ხნის წინ პარლამენტის წინ ვითარება კვლავ დაიძაბა. აქციის მონაწილეებსა და პოლიციას შორის შეტაკება მოხდა. რამდენიმე დაშავებული სასწრაფო დახმარების მანქანით საავადმყოფოში გადაიყვანეს.
აქციის მონაწილეები პარლამენტის შენობასთან დაბრუნდნენ. ისინი დაშლას არ აპირებენ. მას შემდეგ, რაც სამართალდამცავებმა ცრემლსადენი გაზის ყუმბარები და რეზინის ტყვიები ისროლეს, მოქალაქეებმა პარლამენტის მიმდებარე ტერიტორია დროებით დატოვეს, თუმცა, ახლა ისევ უკან ბრუნდებიან.
პარლამენტთან მიმდინარე აქცია სამართალდამცავებმა ცრემლსადენი გაზითა და რეზინის ტყვიებით დაშალეს. აქციაზე შეკრებილი მოქალაქეები ცუდად გახდნენ. დაშავებულები არიან მედიის წარმომადგენლებიც. რამდენიმე დაშავებული მძიმე მდგომარეობაშია. აქციის მონაწილეებს სამართალდამცველებმა ჯერ ცრემლსადენი გაზის კაფსულები ესროლეს. შემდეგ კი მათ რეზინის ტყვიები ესროლეს.
ჯანდაცვის სამინისტროს ინფორმაციით, რუსთაველის გამზირზე მიმდინარე მოვლენების შედეგად აქციის 14 მონაწილე და 38 სამართალდამცველი დაშავდა.
