ვიზიტორებს მტირალას ეროვნულ პარკში კიდევ ერთი ახალი ტურისტული ატრაქცია - „თოკების პარკი“ ელოდება. პარკი ორ მარშრუტს აერთიანებს და მისი სარგებლობა ვიზიტორს 15-20 ლარად შეუძლია.
„თოკების პარკი" ეს არის გასართობ-შემეცნებითი ატრაქცია, რომელიც შედგება თოკებისგან, ხის მორებისგან, ბადეებისგან, ხიდებისგან და სხვადასხვა ელემენტებისგან. პარკი გათვლილია ყველა სეგმენტის მომხმარებელზე. აქ არის ორი მარშრუტი: მოკლე და გრძელი. „თოკების პარკი“ არის ძალიან ექსტრემალური, სახალისო, რაც დაუვიწყარს ხდის მტირალას ეროვნულ პარკში ყოფნას.
„თოკების პარკზე“ ქართველი ვიზიტორების მხრიდან ჯერჯერობით მოთხოვნა ნაკლებია, რადგანაც მათთვის ეს არის ახალი ატრაქცია, ხოლო უცხოელ ვიზიტორებს „თოკების პარკზე“ და ზოგადად მის სარგებლობაზე ინფორმაცია აქვთ“, განმარტავს მტირალას ეროვნული პარკის ვიზიტორთა მომსახურების უფროსი სპეციალისტი თეონა გვიანიძე.
მისი განმარტებითვე, „თოკების პარკში“ მარშრუტი მოზარდებისთვის (მოკლე) 15 ლარი ღირს, ხოლო მარშრუტი საოჯახო (გრძელი) - 20 ლარი.
მტირალას ეროვნული პარკის ადმინისტრაციაში აცხადებენ, რომ 2019 წლის 5 თვის მონაცემებით პარკში ვიზიტორების რაოდენობა 16%-ითაა გაზრდილი.
„ვიზიტორთა სტატისტიკის მიხედვით, იანვარ-მაისში, მტირალას ეროვნულ პარკში ვიზიტორთა 16%-იანი ზრდაა.ვიზიტორთა საერთო რაოდენობაში კი უცხოელ ვიზიტორთა რიცხოვნება 2-ჯერ აღემატება ადგილობრივი ვიზიტორების რაოდენობას.
პარკში ვიზიტორების მნიშვნელოვანი ზრდაა ევროპული ქვეყნებიდან, განსაკუთრებით დიდი ზრდაა გერმანელი, პოლონელი და უკრაინელი ვიზიტორების მხრიდან.
მტირალას ეროვნულ პარკში უცხოელი ვიზიტორების TOP-5 ასე გამოიყურება: ისრაელი, რუსეთი, უკრაინა, გერმანია და პოლონეთი.
მტირალას ეროვნულ პარკში შესვლა ნებისმიერი მსურველისათვის უფასოა. პარკი მუშაობს ყოველ დღე, ვიზიტორთა ცენტრი კი 9-დან 18 საათამდე. პარკში შემოსული ვიზიტორი დროში შეზღუდული არ არის“, განმარტავს თეონა გვიანიძე.
აჭარის ტურიზმის დეპარტამენტში განმარტავენ, რომ მტირალას ეროვნულ პარკში ახალი ატრაქციების გაჩენა დამატებითი ვიზიტორების მოზიდვის წინა პირობაა. ახალი ატრაქციების მოწყობასთან ერთად წესრიგდება საგზაო ინფრასტრუქტურაც.
„წელს, მტირალას ეროვნულ პარკში მისვლა ტურისტებს ახალი, ასფალტირებული გზით შეეძლებათ, რაც ეროვნულ პარკამდე მისვლას კომფორტულს გახდის. მინდა გითხრათ, რომ მთიან აჭარაში ტურისტული მარშრუტებისა და პროდუქტების განვითარება აქტიურად მიმდინარეობს, სადაც ტურისტებს ყოველწლიურად ახალ ტურისტულ მიმართულებებს ვთავაზობთ. ჯამში, მთიანი აჭარის ყველა მუნიციპალიტეტში 15-მდე ტურისტული მარშრუტია მარკირებული, რომლებზეც ტურისტების რაოდენობა გასულ წელს 124%-ით იყო გაზრდილი“, აცხადებს აჭარის ტურიზმის დეპარტამენტის თავმჯდომარის მოადგილე თამარ კაიკაციშვილი.
მტირალას ეროვნული პარკი კავკასიის სამხრეთ-დასავლეთ ნაწილში, მცირე კავკასიონის, სახელდობრ აჭარა-იმერეთის ქედის უკიდურეს დასავლეთ ნაწილში, ქობულეთ-ჩაქვის ქედზე - შავი ზღვის სიახლოვეს მდებარეობს. მისი საერთო ფართობი 15698,8 ჰა-ს შეადგენს. მტირალას ეროვნული პარკის ტერიტორია ქობულეთის, ხელვაჩაურისა და ქედის მუნიციპალიტეტებს შორისაა მოქცეული. ადმინისტრაციული შენობა დაბა ჩაქვში, ხოლო ვიზიტორთა ცენტრი კი ადმინისტრაციული ცენტრიდან 15 კმ-ით დაშორებულ სოფ. ჩაქვისთავში მდებარეობს. ვიზიტორთა ცენტრის საექსპოზიციო და საპრეზენტაციო დარბაზში ვიზიტორს საშუალება აქვს გაეცნოს მტირალას ეროვნული პარკის სპეციფიკას, მომსახურებებს, ტარიფებს, ტურებს და აირჩიოს მისთვის სასურველი ვარიანტი.
მტირალას ეროვნული პარკში ფუნქციონირებს ერთ და 2-დღიანი ტურისტული მარშრუტები. ბილიკები მარკირებული და კეთილმოწყობილია. მოწყობილია საპიკნიკე და საკემპინგე ადგილები, გამოყოფილია ადგილები კოცონის დასანთებად, ასევე ბილიკის მე-9 კმ-ზე არის ტურისტული თავშესაფარი. ეროვნული პარკი ვიზიტორებს სალაშქრო, საცხენოსნო, სამეცნიერო და ეკო-ტურებს სთავაზობს.