აჭარაში ზაფხულის საზღვაო ტურისტული სეზონი ოფიციალურად გახსნილია. აჭარა ტურისტს ელოდება, ტურისტი კი კარგ განწყობას, მზეს და გართობას. ბათუმი საერთაშორისო ტურისტულ ბაზარზეც პოპულარული მიმართულება ხდება, რისი დასტურიცაა ბათუმის მიერ ე.წ. „ტურიზმის ოსკარის“ მოპოვებაა.
აჭარა ტურისტებს საზღვაო დასვენების გარდა მაღალმთიანი აჭარის ტურისტულ სერვისებსაც სთავაზობს, რაც მთლიანობაში ტურისტს საშუალებას აძლევს ერთდროულად დაისვენოს როგორც ზღვაზე ასევე მთაში.
აჭარის ტურისტული სეზონი 15 ივნისს „ზაფხულის ფესტივალით“ გაიხსნა და აჭარის ტურიზმის დეპარტამენტში პირობას დებენ, რომ სეზონის განმავლობაში რეგიონის სტუმრები განებივრებულები იქნებიან ისეთი საერთაშორისო ფესტივალებითა და კონცერტებით, როგორებიცაა ბათუმის საერთაშორისო მუსიკალური ფესტივალი, შავი ზღვის ჯაზფესტივალი, მეგა ვარსკვლავების კონცერტებით ბლექსი არენაზე და ტრადიციული კულტურულ-გასართობი ღონისძიებებით.
გარდა ამისა ბათუმი ტურისტულ სეზონს განახლებული ინფრასტრუქტურითა და ტურისტული სერვისებით შეხვდა.
„მიმდინარე ტურისტული სეზონი საკმაოდ აქტიურად დაგვეწყო. ჩვენ რამდენიმე დღის წინ მოვიპოვეთ ე.წ. „ტურიზმის ოსკარი“, ბათუმი World Travel Awards-ის გამარჯვებული გახდა. წელს სიახლეები გვაქვს როგორც ბათუმში, ასევე თითოეული მუნიციპალიტეტების მიხედვით. ბათუმი სრულადაა მზად ტურისტების მზარდი ნაკადის მისაღებად, ეს იქნება ინფრასტრუქტურის თუ ბულვარის მხრივ.
მინდა ხაზი გავუსვა ერთ ფაქტსაც, ბათუმი სრულად იქნება ადაპტირებული შშმ პირებისთვის. ისინი არამარტო შეძლებენ პლაჟზე ჩასვლას, არამედ სპეციალური ტივიტივა ეტლების მეშვეობით შეძლებენ ზღვაში შესვლასაც. რომელთა სარგებლობა მომხმარებლებისთვის უფასო იქნება.
რაც შეეხება ზღვის მიღმა მიმართულებებს, ის ტურისტული მარშრუტები რომლებიც მუნიციპალიტეტების მიმართულებით გაქვს, ესაა ხულოს მუნიციპალიტეტი, შუახევის მუნიციპალიტეტი, ქედის მუნიციპალიტეტი და რა თქმა უნდა ქობულეთი - აქტიურ ფაზაში შედის და წესრიგდება ინფრასტრუქტურა.
უნდა ავღნიშნო, რომ 2018 წელს მაღალმთიან აჭარაში ვიზიტორთა რაოდენობა 124%-ითაა გაზრდილი“, აცხადებს აჭარის ტურიზმის დეპარტამენტის თავმჯდომარის მოვალეობის შემსრულებელი თამარ კაიკაციშვილი.
თამარ კაიკაციშვილის განმარტებით, მიმდინარე წლისთვის ბათუმის ტურისტული რეკლამა 16 სამიზნე ქვეყანაში მიმდინარეობს. რეკლამა ძირითადად, სატელევიზიო რეკლამას, ონლაინ რეკლამას, პრესს და ინფოტურების ორგანიზებას, გარე რეკლამას და საერთაშორისო ტურისტულ გამოფენებში აჭარის წარმოჩენას ითვალისწინებს. მისივე თქმით, ჯამში, წელს რეგიონის პოპულარიზაცია 27 საერთაშორისო ტურისტულ გამოფენაზე განხორციელდება.
გასულ წლისგან განსხვავებით, სამიზნე ბაზარს წელს გერმანია და დიდი ბრიტანეთიც დაემატა და რამაც უკვე დადებითი ასახვა ჰპოვა ამ ქვეყნებიდან ჩამოსული ტურისტების რაოდენობაზე.
„ზაფხულის ტურისტულ სეზონზე იზრდება ბათუმის მიმართულებით ფრენების რაოდენობაც. წელს, ბათუმის მიმართულებით ფრენებს 25 ავიაკომპანია 24 მიმართულებით შეასრულებს. გარდა რეგულარული ფრენებისა ისრაელიდან, ირანიდან, რუსეთიდან, არაბეთის გაერთიანებული საემიროებიდან, ბელარუსიიდან, თურქეთიდან და სხვა ქვეყნებიდან ემატება ჩარტერული რეისებიც მათ შორის ევროპული ქვეყნებიდან. უფრო კონკრეტულად კი ტალინიდან ბათუმის მიმართულებით 27 ივნისიდან ჩარტერული ავიარეისების განხორციელებას დაიწყებს ავიაკომპანია Smartlynx Airlines-ი, ვილნიუსი - ბათუმი საჰაერო მიმართულებაზე, ტურისტული სეზონის განმავლობაში, ჩარტერულ რეისებს ავიაკომპანია GETJET-ი განახორციელებს, ხოლო ვარშავა-ბათუმი-ვარშავას მიმართულებაზე კი ოპერირებას ავიაკოპანია Enter Air-ი მოახდენს. რამდენიმე დღის წინ დაიწყო ასევე ავიარეისები ბაქო-ბათუმი-ბაქოს მიმართულებით. ფრენებს ავიაკომპანია BUTA Airway-ი აწარმოებს“, აცხადებს კაიკაციშვილი.
ჯამში, 2019 წლის აქტიურ ტურისტულ სეზონზე ბათუმის მიმართულებით 6 ახალი ავიაკომპანია შეასრულებს ფრენებს - FLYNAS, BUTA Airway, GETJET, Enter Air, SkyUp Airlines, Smartlynx Airlines.
გარდა ავიარეისებისაა, ზრდაა განთავსების ობიექტების მხრივაც. აჭარის ტურიზმის დეპარტამენტის მონაცემებით, 2018-2019 წლებში რეგიონში არსებულ რეგისტრირებულ სექტორს 14 განთავსების ობიექტი შეემატა, რითაც არსებული საწოლი ადგილები 1,281-ით გაიზარდა. ჯამში, მიმდინარე ინფორმაციით რეგიონში 393 განთავსების ობიექტი და 22, 883 საწოლი ადგილია.
