უცხო ქვეყნის დროში აღმართვა, რომელთანაც საქართველოს კონფლიქტი ან დიპლომატიური ურთიერთობები გაწყვეტილი აქვს, კანონით დარეგულირდება. აღნიშნულ კანონპროექტზე ჰერალდიკის სახელმწიფო საბჭო მუშაობს.
“რაც მომავალში გამორიცხავს გაუგებრობებს, დაკავშირებულს უცხო ქვეყნის დროშების, მათ შორის იმ სახელმწიფოს დროშის აღმართვა-გამოფენასთან, რომელსაც საქართველოსთან არ აქვს დიპლომატიური ურთიერთობები ან აქვს კონფლიქტი,” – ნათქვამია ჰერალდიკის სახელმწიფო საბჭოს მიერ გავრცელებულ ოფიციალურ პრესრელიზში.
საქართველოს, ამ დროისთვის დიპლომატიური ურთიერთობები გაწყვეტილი აქვს რუსეთსა და სირიის არაბთა რესპუბლიკასთან.
საქართველოში განსაკუთრებით დიდი გამოხმაურება ამა თუ იმ ადგილას ოკუპანტი ქვეყნის, რუსეთის დროშის აღმართვას მოჰყვება ხოლმე. საზოგადოების პროტესტი ამ შემთხვევაში აბსოლუტურად სამართლიანია.
ერთ-ერთი ბოლო სკანდალი ოკუპანტი ქვეყნის დროშის აღმართვასთან დაკავშირებით გუშინ მოხდა, როდესაც ციხისძირში მდებარე სასტუმრო „კასტელო მარეს“ მიერ ეზოში რუსეთის დროშის აღმართვას საზოგადოების მხრიდან მკაცრი პროტესტი მოჰყვა. რის შემდეგაც სასტუმროს ადმინისტრაციამ დროშა ჩამოხსნა.
ოკუპანტი რუსეთის დროშის ფრიალს ბათუმის ქუჩებში, 26 მაისს, საქართველოს დამოუკიდებლობის დღეს, აჭარის განათლებისა და კულტურის მინისტრის თანამდებობიდან გადაყენება მოჰყვა.