რაც უფრო ვშორდებით სააკაშვილის პერიოდის მტრობისა და კონფრონტაციულობის ჩიხს, თავს ვაღწევთ ყველა სიძნელეს და ვამყარებთ ნორმალურ ურთიერთობას ადამიანებსა და ხალხებს შორის, მით უფრო მეტად იგრძნობა ნერვიულობა ვაშინგტონსა და ბრიუსელში - ამის შესახებ რუსეთის საგარეო საქმეთა მინისტრის მოადგილემ გრიგორი კარასინმა 13 ივნისს პრაღაში აბაშიძესთან შეხვედრის დაწყებამდე „რადიო თავისუფლებასთან“ ინტერვიუში განაცხადა.
კარასინის თქმით, დასავლეთი ფიქრობს, რომ საქართველო უკვე გარკვეული ბლოკის შემადგენელი ნაწილია, და რუსეთის წინააღმდეგ მიმართული ქმედებების შემთხევაში მასზე დაყრდნობას შეძლებს.
„ეს ხალხი ფიქრობს, რომ საქართველო უკვე არის შემადგენელი ნაწილი გარკვეული ბლოკის, რომელზეც შესაძლებელია დაყრდნობა რუსეთის ფედერაციის წინააღმდეგ მიმართული გარკვეული არამეგობრული მოქმედების შემთხვევაში, მით უფრო, რომ სამხრეთ კავკასია უშუალოდ მდებარეობს ჩვენი საზღვრების მახლობლად. და ეს ხალხი გააქტიურდა. ისინი ემზადებიან ნატოს დეკემბრის სამიტისთვის. აშშ-ის სახელმწიფო მდივანი (მაიკ) პომპეო ღია განცხადებას აკეთებს, რომ საჭიროა ნატოში საქართველოს დაჩქარებული მიღება”, - განაცხადა კარასინმა და აღნიშნა, რომ ეს რუსეთ-საქართველოს ურთიერთობაზე დამღუპველად იმოქმედებს.
საუბარი შეეხო ვაშინგტონში საქართველოს პრემიერ მინისტრის მამუკა ბახტაძისა და აშშ-ს სახელმწიფო მდივნის მაიკ პომპეოს შეხვედრასაც, რომელზეც ანაკლიის პორტთან დაკავშირებით მაიკ პომპეომ განაცხადა, რომ ეს პროექტი დაეხმარება საქართველოს განავითაროს ურთიერთობები თავისუფალ ეკონომიკებთან და არ მოექცეს რუსეთისა და ჩინეთის გავლენის ქვეშ, რომლებიც თავს საქართველოს მეგობრებად წარმოაჩენენ, თუმცა არ გამოხატავენ საქართველოს ინტერესებს.
კარასინმა ჟურნალისტის მიერ პომპეოს განცხადების ციტირების შემდეგ აღნიშნა, რომ რუსეთი დაინტერესებულია საქართველოს განვითარებით, თუმცა რაც რუსეთსა და ჩინეთზე ითქვა, მისთვის მიუღებელია.
„ჩვენ დაინტერესებული ვართ საქართველოს, მისი ეკონომიკის, სოციალური, კულტურული და სხვა სფეროების განვითარებით. საქართველომ უნდა გადაწყვიტოს, რა მოუხერხოს ანაკლიის პორტს, მაგრამ რაც რუსეთისა და ჩინეთის მიმართ ითქვა, ეს სულაც არ არის ის ტონი, რომელიც ჩვენ ხელს გვაძლევს", - განაცხადა კარასინმა.
• ამავე თემაზე იხილეთ
კარასინი აკრიტიკებს აშშ-ის „ტონს“ ანაკლიის პორტთან დაკავშირებით
მთავრობის ადმინისტრაცია აბაშიძე-კარასინის შეხვედრის შესახებ ინფორმაციას ავრცელებს
