ამერიკის შეერთებულ შტატებში, რიჩმონდში დაკავებულია 24 წლის მამაკაცი, რომელმაც ცემითა და წამებით საკუთარ 3 თვის შვილს 27 ძვალი დაუმტვრია.
შონ დიკსი 3 თვის გოგონას მიმართ ძალადობისა და შეუბრალებელი მოპყრობის მუხლით პოლიციელებმა 4 ივნისს, საკუთარ სახლში დააკავეს.
„გოგონას თავში ურტყამდნენ. 3 თვის ბავშვი ხელში აიყვანეს და იატაკზე რამდენჯერმე დაახეთქეს. წარმოუდგენელია, როგორ შეიძლება მამამ ასეთი რამ საკუთარ შვილს გაუკეთოს“, - განაცხადა რიჩმონდის პოლიციის უფროსმა როდნი რიჩარდსონმა ტელეკომპანია CBS-თან საუბარში.
3 თვის გოგონას 27 მოტეხილობა თავის ქალაზე, ნეკნებზე, ხერხემალზე, მკლავებზე, ფეხებზე, ხელებსა და ფეხის თითებზე აღენიშნება. ბავშვს აგრეთვე ბადურის სისხლდენა, სისხლჩაქცევები და შიდა ორგანოების დაზიანებები დაუდგინდა.
24 წლის ბრალდებულმა დანაშაული აღიარა და აღნიშნა რომ მას ფსიქოლოგიური პრობლემები აქვს. შონ დიკსმა პოლიციასთან საუბარში სათამაშო დათვის დახმარებით აღწერა დანაშაულის სცენა და აღნიშნა, რომ მომხდარის გამო ძალიან წუხს.
რიჩმონდის პოლიციის უფროსის განცხადებით ბავშვი ცოცხალია.
„საბედნიეროდ, გოგონა ცოცხალია და იმედს ვიტოვებთ რომ გოგონა გამოჯანმრთელებას განაგრძობს“, - აღნიშნა რიჩარდსონმა.