"ეს იყო კომპლექსური საქმე - მესმის, რომ საზოგადოებას ეს სჭირდებოდა გაცილებით ადრე, მაგრამ საზოგადოების განწყობებზე დაყრდნობით ბუნებრივია, ადამიანებს ბრალს ვერ წავუყენებთ", - განაცხადა შინაგან საქმეთა მინისტრის მოადგილემ ნათია მეზვრიშვილმა "ტელეკომპანია პირველის" გადაცემა "რეაქციაში", სადაც მან ხორავას ქუჩის საქმის გამოძიების მიმდინარეობასა და მის შედეგებზე ისაუბრა.
მეზვრიშვილის თქმით, ეს საქმე გახლავთ ნათელი დასტური იმის, რომ შინაგან საქმეთა სამინისტრომ ფაქტობრივად, თავისი დანაპირები შეასრულა.
"ეს იყო უაღრესად რთული საქმე, კომპლექსური საქმე, რომელზე მუშაობაც შინაგან საქმეთა სამინისტროს ერთი დღითაც არ შეუჩერებია. თქვენ გახსოვთ, რომ მას შემდეგ რაც პირველი ინსტანციის სასამართლომ გადაწყვეტილება გამოიტანა, ჩვენ ხელახალი გამოძიების ფარგლებში არაერთი საგამოძიებო ღონისძიება ვაწარმოეთ, არაერთი საგამოძიებო მოქმედება ჩავატარეთ, ვახდენდით საზოგადოების და ბატონი ზაზა სარალიძის ინფორმირებას პროაქტიულ რეჟიმში და არაერთი პირი მიეცა სისხლის სამართლის პასუხისმგებლობაში. ეს საქმე გახლავთ ნათელი დასტური იმის, რომ შინაგან საქმეთა სამინისტრომ ფაქტობრივად, თავისი დანაპირები შეასრულა. უბრალოდ, როდესაც რაღაც პირობების შესრულებაზე ვსაუბრობთ, აუცილებელია, დრო რაც ასეთი კომპლექსური საქმეების გამოძიებას სჭირდება", - განაცხადა მეზვრიშვილმა.
მინისტრის მოადგილის განცხადებით, ძალიან სამწუხაროა და ეს საქმე ნათელი დადასტურებაა იმის, თუ როგორ არ უნდა მოხდეს პოლიტიკური მიზნებისთვის ასეთი ტრაგედიების გამოყენება.
"ჩვენ მივყვებოდით საკმაოდ გეგმაზომიერად ყველა იმ პროცედურას, რაც სისხლის სამართლის საპროცესო კოდექსით არის დადგენილი. მე მესმის, რომ საზოგადოებას ეს სჭირდებოდა გაცილებით უფრო ადრე, მაგრამ საზოგადოების განწყობებზე და საგამოძიებო კომისიის მოწოდებებზე და განწყობაზე დაყრდნობით ჩვენ ბუნებრივია, ადამიანებს ბრალს ვერ წავუყენებთ. მით უმეტეს, როდესაც საქმე ეხებათ მოზარდებს. ძალიან სამწუხაროა და ეს საქმე ნათელი დადასტურებაა იმის, თუ როგორ არ უნდა მოხდეს პოლიტიკური მიზნებისთვის ასეთი ტრაგედიების გამოყენება. ასეთი ტრაგედიების პოლიტიკური მიზნებისთვის გამოყენება, პირველ რიგში დააზარალებს იმ ადამიანების ინტერესებს, რომლებიც ასეთ საქმეებში დაზარალებულები არიან. რა თქმა უნდა, ჩვენ არ გავურბივართ პასუხისმგებლობას, რომელზეც დეტალურად შემიძლია ვისაუბრო, მაგრამ ის ადამიანებიც არ უნდა გაურბოდნენ პასუხისმგებლობას, ვინც გამოძიებასთან თანამშრომლობის უარის გამო, გამოძიებისთვის გზა-კვალის არევის გამო, ეს პროცედურები აქამდე მიიყვანა", - განაცხადა ნათია მეზვრიშვილმა.
