ნიუ-ჰემპშირის სენატმა შტატის ტერიტორიაზე სიკვდილით დასჯა გააუქმა.
სენატორებმა შტატის გუბერნატორის ვეტო დაძლიეს, რომელიც მან დაადო კანონს სიკვდილით დასჯის გაუქმების შესახებ. ამგვარად, ნიუ-ჰემპშირი ამერიკის 21-ე შტატი გახდა, სადაც სასჯელის უმაღლესი ზომა გაუქმდა.
სიკვდილით დასჯის გაუქმებას ხმა 8-ის წინააღმდეგ 16-მა სენატორმა მისცა.
როგორც გამოცემა Washington Post-ი აღნიშნავს, ხმის მიცემა სიმბოლურ ხასიათს ატარებდა, რადგან შტატში სიკვდილით დასჯის მოქმედი სისტემა არ არსებობდა. ნიუ-ჰემპშირში მხოლოდ ერთი მსჯავრდებული - მაიკლ ადისონი ელოდება სასიკვდილო განაჩენის აღსრულებას, რომელმაც 2006 წელს პოლიციელი მოკლა. სენატის გადაწყვეტილება მის განაჩენს არ შეეხება.
ნიუ-ჰემპშირში სასიკვდილო განაჩენი ბოლოს 1939 წელს აღსრულდა.