ეროვნულ ლიგაში, გულშემატკივრების მხრიდან წესების დარღვევის გამო ბათუმის „დინამო“ 50 ათას ლარამდე თანხით დააჯარიმეს. ინფორმაციას აჭარის ტელევიზია ავრცელებს.
სფფ-ს სადისციპლინო კომიტეტმა, ანგისას ბაზაზე ჩატარებულ შეხვედრებში, გულშემატკივართა მხრიდან მოედანზე შეჭრის 3 ფაქტი გამოავლინა და კლუბს ფინანსური ჯარიმა დააკისრა.
ამის გარდა, ქომაგებმა სტადიონის ინფრასტრუქტურაც დააზიანეს და მსაჯებს სიტყვიერი შეურაცხყოფაც მიაყენეს.
ბათუმის „დინამოს“ ადმინისტრაციამ ოფიციალურ Facebook გვერდზე სპეციალური განცხადება გაავრცელა და გულშემატკივრებს წესრიგის დაცვისკენ მოუწოდა:
ძვირფასო გულშემატკივრებო, პირველ რიგში გვინდა კიდევ ერთხელ დავაფიქსიროთ ჩვენი პატივისცემა თქვენს მიმართ და გადაგიხადოთ მადლობა იმ ინტერესის გამო რასაც კლუბის მიმართ იჩენთ. ეს განსაკუთრებით საშინაო მატჩებში იგრძნობა და იმედი გვაქს, რომ ერთად მნიშვნელოვან გამარჯვებებს კიდევ ბევრჯერ ვიზეიმებთ. თუმცა არსებობს სტადიონზე შესვლისა და ქცევის წესები რაზეც გვინდა ამ შემთხვევაში ყურადღება გავამახვილოთ, კერძოდ ბოლო საშინაო მატჩებზე ე.წ. ანგისას საფეხბურთო ბაზაზე დაფიქსირდა:
· ნივთების სროლა მოედანზე.
· მაყურებლის შეჭრა სათამაშო მოედანზე.
· სტადიონის ტერიტორიის ღობეებზე აძრომა და სტადიონის ინფრასტრუქტურის დაზიანება.
· ღონისძიებაში ჩართული პირების მიმართ ზედმეტად აგრესიული ქცევა და შეურაცხყოფა.
· სტიუარდის/განმკარგულებლის ან უსაფრთხოების თანამშრომლის მოთხოვნა/მითითებისადმი დაუმორჩილებლობა.
ზემოთჩამოთვლილი პუნქტების დარღვევა პირველ რიგში საფრთხეს უქმნის თქვენი და სხვა პირთა სიცოცხლეს და უსაფრთხოებას. ასევე აზარალებს ჩვენს კლუბს მატერიალურად, რადგან უსაფრთხოების ნორმების დარღვევა ჯარიმების გადახდის ვალდებულებას გვაკისრებს და ამ კუთხით კლუბმა უკვე მიიღო სოლიდური ფინანსური სასჯელი. საბოლოო ჯამში ამ ყველაფერმა შეიძლება იქამდეც მიგვიყვანოს, რომ „დინამო“ ბათუმს რამდენიმე საშინაო თამაშის ჩატარება გულშემატკივრის გარეშე/ან სხვა ქალაქში მოუხდეს, რაც ჩვენთვის უდიდესი დარტყმა იქნება.
გუნდის მოთამაშეების, სამწვრთნელო შტაბის და ადმინისტრაციის სახელით უმორჩილესად გთხოვთ, ნუ დაარღვევთ სტადიონზე ქცევის წესებს და მოუწოდეთ თქვენს გვერდით მყოფ, სხვა გულშემატკივრებსაც დაიცვან წესრიგი და დაემორჩილონ სტიუარდების ან უსაფრთხოების სამსახურის თანამშრომლების მითითებებს.
პატივისცემით „დინამო“ ბათუმის ადმინისტრაცია.