ბათუმის შოთა რუსთაველის სახელმწიფო უნივერსიტეტის დისციპლინარულმა კომისიამ, სექსუალურ შევიწროებაში დადანაშაულებულ ლექტორს, ომარ მახარაძეს შრომითი ხელშეკრულება შეუწყვიტა. კომისიის გადაწყვეტილების გასაჩივრება ომარ მახარაძეს ერთი თვის განმავლობაში სასამართლოში შეუძლია.
საბჭოს წევრებმა ლექტორს ეთიკური სტანდარტების დარღვევა დაუდგინეს. სალექციო საქმიანობა კი მახარაძეს უკვე ერთი კვირაა შეჩერებული აქვს. 27 მაისს სექსუალურ შევიწროებაში დადანაშაულებულმა ლექტორმა ბათუმის საკრებულოში თანამდებობა დატოვა. მას სტუდენტებთან აუდიტორიაში საქმიანობის უფლებაც შეუჩერდა.
კომისიის თითეულმა წევრმა, შინაგანი რწმენით და იმ მასალაზე დაფუძნებით, რაც ჩვენ გვქონდა, კენჭი ვუყარეთ და გადავწყვიტეთ, რომ მას ხელშეკრულება უნდა შეწყვეტოდა,'' - უთხრა ჟურნალისტებს კომისიის თავმჯდომარემ.
ომარ მახარაძე კომისიის სხდომასაც უნდა დასწრებოდა, თუმცა უნივერსიტეტში არ მისულა.
მეორე კურსის სტუდენტმა, 21 მაისს თქვა, რომ ლექტორი მას ინტიმური შინაარსის შეტყობინებებს უგზავნიდა. ომარ მახარაძე ბრალდებებს უარყოფს, ამბობს, რომ მას ტელეფონის ე.წ. აიქლაუდი გაუტეხეს. თავდაპირველად, შინაგან საქმეთა სამინისტრომ ''სტუდენტის საქმეზე'' გამოძიება 150-ე „იძულების“ მუხლით დაიწყო, თუმცა მოგვიანებით მუხლი შეცვალა. სამართალდამცველები ამ ეტაპზე საკითხს, „სექსუალური ხასიათის ქმედების იძულების მუხლით იძიებენ.