მე მაინტერესებს, როგოც ჩვეულებრივი მოქალაქე, რატომ ვარ ვალდებული რომ ეკლესიის პოლიტიკას გავყვე ბრმად, - განაცხადა მომღერალმა თამრიკო ჭოხონელიძემ ტელეკომპანის „პრიველის“ გადაცემა „რეაქციაში“
მომღერალი მიიჩნევს რომ სექსუალური ორიენტაციის ნიშნით ადამიანების დისკრიმინაცია არაა მართებული. ჭოხონელიძე ამბობს, რომ შემთხვევითი არაა, რომ 17 მაისი საპატრიარქომ ოჯახის სიწმინდის დღედ გამოაცხადა, რის გამოც საპატრიარქოს მიერ ორგანიზებულ კონცერტში მონაწილეობა არ სურს.
"ეკლესიას თავისი პოლიტიკა გააჩნია. მე მაინტერესებს, როგოც ჩვეულებრივი მოქალაქე, რატომ ვარ ვალდებული რომ ეკლესიის პოლიტიკას გავყვე ბრმად. მე პოლიტიკას ვერ ვეთანხმები. მე პატრიარქს ძალიან კარგად ვიცნობ, მე მას ძალიან ვუყვარვარ და მე ის ძალიან მიყვარს და ჩვენ საზოგადოება ძალიან კარგად ახსოვს რომ ვინც ჩვენ ტალახი გვესროლა, თავის დროზე პატრიარქიც არ დაინდო. მე ყოველთვის მის გვერდში ვიყავი და ვიდგები ყოველთვის, მაგრამ თავად პატრიარქს არ უყვარს ბრმად გამყოლი ხალხი",- ამბობს ჭოხონელიძე.
ჭოხონელიძე ამბობს, რომ ნებისმიერ დღეს საპატრიარქოს გვერდით იქნება, გარდა 17 მაისისა.
"ნებისმიერ დღეს საპატრიარქოსთან ვარ, ოღონდ ეს არ იყოს მიზანმიმართულად 17 მაისი, რაც გამოიწვევს და იწვევს კიდევაც დაპირისპირებას. წელს არ მოხდება? გაისად გაღიზიანდება ვიღაც და ა.შ",- ამბობს ჭოხონელიძე.