შვედეთის ელჩი ულრიკ ტიდესტორმი მიკრობლოგ ტვიტერზე ბათუმში, „მოცეკვავე შადრევნებთან“, არდაგანის ტბის კიდევ ერთ ფოტოს აქვეყნებს და წერს:
„მოცეკვავე შადრევნები“ არდაგანის ტბასთან რამდენიმე საათის შემდეგ. როგორც გავარკვიე, „ბათუმის წყალი“ ხშირად ასუფთავებს ტბას და ამ წუთებში ქალაქის ხელმძღვანელობა ტბის დაბინძურების მიზეზებს არკვევს. ტბის სრული მშვენიერება აღდგენილია“.
შეგახსენებთ, რომ დღეს დილით, შვედეთის ელჩმა ულრიკ ტიდესტორმმა ტვიტერზე გამოაქვეყნა ბათუმის "მოცეკვავე შადრევნები" ფოტო, სადაც ჩანდა, რომ მიმდებარე ტერიტორია დანაგვიანებულია.
ელჩის მიერ გამოქვეყნებულ ფოტოებს მალევე გამოეხმაურა კომპანია „ბათუმის წყალი“ და აღნიშნა, რომ არდაგანის ტბაში სანიაღვრე სისტემის მეშვეობით, უცხო სითხის შემოდინება დაფიქსირდა და სწორედ ამიტომაც ჩანდა ტბა დაბინძურებული.
„გვსურს გამოვეხმაუროთ საქართველოში შვედეთის ელჩის, ულრიკ ტიდესტორმის მიერ ტვიტერზე გამოქვეყნებულ ფოტოებს. 26 აპრილს დილის საათებში არდაგანის ტბაზე დაფიქსირდა ტბაში ბლანტი, უცხო სითხის შემოდინება სანიაღვრე სისტემის მეშვეობით. ფაქტის დაფიქსირებისთანავე, ადგილზე მობილიზდა შპს "ბათუმის წყალის" სპეცტექნიკა და მიმდინარეობს გაწმენდითი სამუშაოები. ქალაქის სანიღვრე სისტემებიდან, სანიაღვრე წყლების შეკრება არდაგანის ტბაში ხდება. სანიღვრე წყლები ხშირად დაბინძურებულია ნარჩენებით, რაც საბოლოო ჯამში თავს იყრის ტბაში. მოსახლეობას ვთხოვთ, არ ჩაყარონ ნაგავი სანიაღვრე ცხაურში და სანიაღვრე არხებში. არდაგანის ტბაზე არსებული პროცესის მნიშვნელოვანი გაუმჯობესება ტბის მიმდებარედ მშენებარე სანიაღვრე სატუმბი სადგურის მშენებლობის დასრულების შემდგომ მოხდება. სატუმბის მეშვეობით, არდაგანის ტბისგან დამოუკიდებლად მოხდება ქალაქის სანიაღვრე სისტემების შეკრება და ზღვაში გადატუმბვა”, - განაცხადეს „ბათუმის წყალში“.