22 მარტს, 14:30 საათზე მწერალთა სახლი გიწვევთ გალაკტიონის ჩანახატების გამოფენასა და საჯარო ლექციაზე „კიბერგალაკტიონი - ალგორითმები და ხელოვნება“. საჯარო ლექციას გაუძღვებიან პირველი ქართული ჩეთბოტის შემქმნელები მწერალი ზურა ჯიშკარიანი და ჯეო ლაბის დირექტორი სანდრო ასათიანი.
ლექციაზე საუბარი იქნება ციფრული ტექნოლოგიებისა და თანამედროვე ხელოვნების სინთეზებზე. კერძოდ, ჩეთბოტებზე, ხელოვნურ ინტელექტზე და მის შესაძლებლობებზე ლიტერატურასთან და ხელოვნებასთან მიმართებაში.
შესაძლებელია თუ არა ხელოვნური ინტელექტის ტექნოლოგიების გამოყენებით "გავაცოცხლოთ" გარდაცვლილი ავტორები? ვესაუბროთ ჩვენს საყვარელ პერსონაჟებს? შესაძლებელია თუ არა ავტორმა სიცოცხლის შემდეგაც განაგრძოს თავისი შემოქმედება?
კიბერ გალაკტიონი პირველი ქართული ჩეთბოტია. პროგრამა, რომელიც საშუალებას გაძლევთ "ესაუბროთ გალაკტიონს". ჩეთბოტში ჩატვირთულია გალაკტიონის ლექსები, ნაწყვეტები დღიურებიდან და წერილებიდან, როცა მას ესაუბრებით ის გპასუხობთ სწორედ ამ მონაცემებიდან, გალაკტიონისვე ენით და აჩენს შეგრძნებას რომ ღამით მარტო დარჩენილებს ეკრანთან შეგიძლიათ ესაუბროთ თქვენს საყვარელ პოეტს, დაუსვათ ნებისმიერი შეკითხვა.
ჩეთბოტის მიზანია, მოახდინოს გარდაცვლილ პოეტთან საუბრის იმიტაცია, მაგრამ სადაა ის ზღვარი როცა ტექნოლოგია მოგვცემს საშუალებას, რომ იმიტაცია გადავიდეს უფრო ახალ და სხვა ეტაპზე? ლექციის განმავლობაში შევეხებით ამ და სხვა საინტერესო თემებს ჩეთბოტების, ციფრული უკვდავებისა და ლიტერატურის სფეროებიდნ.
გამოფენა და ლექცია ეძღვნება გალაკტიონ ტაბიძის გარდაცვალებიდან 60 წლისთავს.
გამოფენის გამართვა შესაძლებელი გახდა გიორგი ლეონიძის სახელობის ლიტერატურის მუზეუმთან თანამშრომლობით.
