ქართულ-თურქულმა კომპანია "ნუსრეთ ჯორჯიამ" აჭარაში სასოფლო-სამეურნეო მიწის ნაკვეთი შეიძინა, სადაც სამომავლოდ მეცხოველეობის ფერმა უნდა ააშენოს. როგორც სააგენტო "ჯი-ეიჩ-ენს" აჭარის ფინანსთა და ეკონომიკის სამინისტროდან აცნობეს, "ნუსრეთ ჯორჯიამ" ქობულეთის მუნიციპალიტეტის, სოფელ ქვედა აჭყვაში მდებარე 1005 კვმ შენობა-ნაგებობა (ყოფილი მეცხოველეობის ფერმა) და მასზე მიმაგრებული 4743 კვმ მიწის ნაკვეთი 37 ათასი ლარად შეიძინა.
აჭარის მთავრობასა და ინვესტორს შორის გაფორმებული ხელშეკრულების თანახმად, ინვესტორი ვალდებულია აუქციონის ჩატარებიდან 12 თვის ვადაში თანამედროვე ტიპის მეცხოველეობის ფერმა შექმნას, რომელიც გათვლილი იქნება არანაკლებ 100 რქოსან პირუტყვზე, რისთვისაც უნდა განახორციელოს 150 000 ლარის ინვესტიცია. აღნიშნული პერიოდის გასვლის შემდეგ დაასაქმოს არანაკლებ 6 საქართველოს მოქალაქე და შეინარჩუნოს პროფილი არანაკლებ 5 წლის განმავლობაში.
როგორც სააგენტო "ჯი-ეიჩ-ენს" "ნუსრეთ ჯორჯიაში" განუცხადეს, მეცხოველეობის ფერმა ძირითადად ცოცხალი პირუტყვისა და ხორცის რეალიზაციაზე იქნება ორიენტირებული და არა რძისა და რძის პროდუქტების გაყიდვაზე.