მედიაჰოლდინგ "ჯორჯიან თაიმსისა~ და ქართული და ინგლისურენოვანი გაზეთების "ჯორჯიან თაიმსის~ ჟურნალისტები და თანამშრომლები ორგანიზაციის ხელმძღვანელ, ჰოლდინგის პრეზიდენტ მალხაზ გულაშვილთან დაკავშირებით მედიის წარმომადგენლებისადმი მიმართვას ავრცელებენ.
"იშვიათია ისეთი გამორჩეულად თბილი ურთიერთობა, როგორიც წლების განმავლობაში, ჩვენს ჰოლდინგში სუფევს. ამის მიზეზი არის ის, რომ ჩვენი ხელმძღვანელი, მალხაზ გულაშვილი, გამოირჩევა განსაკუთრებული დამოკიდებულებით ადამიანური და სულიერი პრინციპებისადმი. ეს ყოველთვის იგრძნობა როგორც სამუშაო პროცესისას, ისე ჩვეულებრივ, სუფთა ადამიანურ ურთიერთობებში", _ აღნიშნულია მედიის წარმომადგენლების მისამართით გავრცელებულ მიმართვაში.
თუმცა, მათი განცხადებით, ასეთ დამოკიდებულებას გულაშვილისთვის არასოდეს შეუშლია ხელი, იყოს ობიექტური, მომთხოვნი და პრინციპული, რაც განაპირობებდა და განაპირობებს დღესაც იმას, რომ მედიაჰოლდინგში საქმე ყოველთვის განსაკუთრებული სიზუსტით და თანმიმდევრულადაა აწყობილი.
"ძვირფასო კოლეგებო, კიდევ ერთხელ გიდასტურებთ ჩვენს პატივისცემას და ველით თქვენგან თანადგომას, იმ თანადგომას, რომელიც "ჯორჯიან თაიმსს~ და მის ხელმძღვანელს მრავალჯერ გაუწევია კოლეგებისადმი, ნიშნად დიდი პატივისცემისა თავისუფალი ქართული მედიისადმი", _ აღნიშნულია განცხადებაში.
