მსოფლიოს წამყვან ბირჟებზე ნავთობის ფასმა 31 ცენტით 75,63 დოლარამდე დაიწია. ფასის ვარდნა უკვე მესამე დღეა გრძელდება.
როგორც ანალიტიკოსები აღნიშნავენ, ბირჟებზე ვაჭრობა ნედლეულის მარაგის ზრდის ფონზე მიმდინარეობს. კერძოდ. აშშ-ში, რომელიც მსოფლიოში ენერგორესურსების უმსხვილეს მომხმარებლად მიიჩნევა, ბენზინის მარაგი, რომელიც ექსპერტთა პროგნოზით, ზაფხულის სეზონზე უნდა შემცირებულიყო, პირიქით გაიზარდა.
იმის მიუხედავად, რომ ნედლი ნავთობის მარაგი იმაზე მეტად შემცირდა, ვიდრე ვარაუდობდნენ, მაინც არასაკმარისი აღმოჩნდა იმისათვის, რომ ნავთობის ფასი გაზრდილიყო.
როგორც ექსპერტები აღნიშნავენ, ამავე დროს ინვესტორებს, ევროპის, აშშ-ისა და ჩინეთის ნეგატიური ცნობების ფონზე, რომელიც უიმედო სტატისტიკას შეიცავდა, ეკონომიკის აღდგენასთან დაკავშირებიოთ შიში გაუჩნდათ.
