30 ივნისს 14:00 საათზე, ერთიანი ეროვნული გამოცდების მედიაცენტრი გაიხსნება. პირველ ბრიფინგს, რომელიც გამოცდების დაწყებას დაეთმობა, გამოცდების ეროვნული ცენტრის დირექტორი მაია მიმინოშვილი და განათლებისა და მეცნიერების მინისტრის პირველი მოადგილე კოკა სეფერთელაძე ჩაატარებენ.
მედიაცენტრი ტრადიციულად ერთიანი ეროვნული გამოცდების დაწყებისას იხსნება. 2010 წლის ერთიანი ეროვნული გამოცდები 1-ელ ივლისს ქართული ენისა და ლიტერატურის გამოცდით დაიწყება.
საგამოცდო ტესტების ტრანსპორტირება ეროვნული ბანკისა და "ლიბერთი" ბანკის საცავებიდან 06:30 საათზე მოხდება. ტესტებს საგამოცდო ცენტრებში საპატრულო პოლიციისა და უშიშროების სამსახურის თანხლებით მიიტანენ.
08:00 საათზე საქართველოს 12 საგამოცდო ქალაქში განთავსებულ 15 საგამოცდო ცენტრში აბიტურიენტთა რეგისტრაცია, ხოლო 09:00 საათზე - პირველი გამოცდის პირველი სესია დაიწყება.
2009 წლის ერთიანი ეროვნული გამოცდებისათვის 36421 აბიტურიენტია რეგისტრირებული.
წელს გამოცდების ეროვნული ცენტრი გარდა ერთიანი ეროვნული გამოცდებისა საერთო სამაგისტრო გამოცდასა და პედაგოგთა სასერტიფიკაციო გამოცდებს ჩაატარებს.
სასერტიფიკაციო გამოცდები 2010 წელს პირველად ტარდება. პედაგოგები პირველ გამოცდას 13 ივლისს პროფესიულ უნარებში ჩააბარებენ. სამაგისტრო გამოცდა 7 და 8 ივლისსაა დაგეგმილი.
გამოცდები ტარდება შემდეგ ქალაქებში: სიღნაღი, თელავი, რუსთავი, თბილისი, გორი, ახალციხე, ქუთაისი, ოზურგეთი, ფოთი, ზუგდიდი, ბათუმი, ხულო.
საგამოცდო პროცესში ჩართულია 1300 მეთვალყურე და კურატორი, უშუშროების სამსახურისა და საპატრულო პოლიციის 30-მდე ბრიგადა. ყველა საგამოცდო ცენტრში განთავსდება სამედიცინო პუნქტი, ცენტრთან კი იმორიგევებს სასწრაფო დახმარების მანქანა.
