2010 წლის ბიუჯეტის პროექტს პარლამენტი პარასკევის სესიაზე განიხილავს. აღნიშნული გადაწყვეტილება დღეს ბიუროს სხდომაზე მიიღეს. როგორც საფინანსო საბიუჯეტო კომიტეტის თავმჯდომარემ ზურაბ მელიქიშვილმა განაცხადა, ბიუჯეტის პროექტი თითქმის უცვლელი სახით არის შესული.
"მთავრობა კომიტეტის შენიშვნებს იზიარებს, მაგრამ დღეს არსებული პროცედურის თანახმად, სესიაზე პროექტი წარმოდგენილი იქნება პირველადი სახით. შენიშვნები კი მხოლოდ სასესიო განხილვის შემდეგ იქნება შეტანილი. შენიშვნების ასახვის შემდეგ მთავრობა პარლამენტს დაუბრუნებს ბიუჯეტს განსახილველად და ამ განხილვის შემდეგ მოხდება ბიუჯეტის კენჭისყრის დამტკიცება", _ განაცხადა მან.
ქრისტიან-დემოკრატები ბიუჯეტის პროექტის განხილვისთვის ვადას ითხოვენ. ისინი მიიჩნევენ, რომ პროექტის განხილვა არ უნდა მოხდეს ნაჩქარევად და დეპუტატებს ორკვირიანი ვადა მაინც უნდა მიეცეთ გადამუშავებული ბიუჯეტის გასაცნობად.
ამ მოთხოვნას არც პარლამენტის თავმჯდომარე და არც საფინანსო საბიუჯეტო კომიტეტის თავმჯდომარე არ იზიარებენ და აცხადებენ, რომ განხილვისთვის დრო იყო სრულიად საკმარისი. ფრაქციას კი შენიშვნების დაფიქსირება სასესიო განხილვაზედაც შეეძლება.
მელიქიშვილი აქცენტს აკეთებს იმაზე, რომ ყველა შეენიშვნის ბიუჯეტში ასახვა მოხდება მხოლოდ სასესიო განხილვის შემდეგ და ახლა განხილვის ორი კვრით გადადებას აზრი არ აქვს.