ქრისტიან-დემოკრატები ადგილობრივი წარმოებისთვის ხელის შეწყობას ითხოვენ. ისინი მიიჩნევენ, რომ მთავრობამ არ უნდა გადადგას ისეთი ნაბიჯები, რაც ადგილობრივ წარმოებას დააზარალებს. ეს განცხადება ქრისტიან-დემოკრატების წარმომადგენელმა ლევან ვეფხვაძემ დღეს ბიუროს სხდომაზე გააკეთა.
როგორც მან აღნიშნა, მთავრობის მიერ ინიცირებულია კანონპროექტი, რომლის თანახმად, 5-პროცენტიანი საბაჟო განაკვეთი უქმდება, რაც - ეხება თამბაქოს წარმოებას.
"ეს კი იმას ნიშნავს, რომ იმპორტირებული თამბაქოს თვითღირებულება შემცირდება და მძიმე მდგომარეობაში აღმოჩნდება ადგილობრივი წარმოება. ამის გამო კი არა მარტო დაიკარგება სამუშაო ადგილები, არამედ პრობლემები შეექმნება ადგილობრივ წარმოებას", - აცხადებს ვეფხვაძე.
დავით ბაქრაძის გადაწყვეტილებით, ქრისტიან-დემოკრატებს ამ საკითხზე პასუხს ფინანსთა მინისტრი გასცემს. მიმდინარე კვირის არასასესიო დღეს გაიმართება ქრისტიან-დემოკრატების ფრაქციის სხდომა, სადაც აღნიშნულთან დაკავშირებით ქრისტიან- დემოკრატების შეკითხვებს პირადად ფინანსთა მინისტრი უპასუხებს. შესაბამისად გადაიწევს საგადასახადო და საბაჟო კოდექსში ცვლილებების შეტანის პროექტის განხილვის დაწყება.
კანონპროექტი მთავრობის მიერ ჯერ კიდევ წინა კვირას იყო ინიცირებული და შესაბამისად საკომიტეტო განხილვები უნდა დაწყებულიყო, თუმცა ბაქრაძე აცხადებს, რომ მიმდინარე კვირა გამოიყენონ პოლიტიკური განხილვებისთვის და ამის შემდეგ გადავიდნენ საკომიტეტო განხილვებზე.
