პარლამენტის წევრი პაატა დავითაია პარლამენტის თავმჯდომარეს, დავით ბაქრაძეს სთხოვს, პარლამენტმა დაავალოს ძალოვან უწყებებს, უზრუნველყონ გალის რაიონში საქართველოს მოქალაქეების დაცვა. ეს მოთხოვნა მან დღეს ბიუროს სხდომაზე დააყენა.
როგორც მან აღნიშნა, აფხაზეთში ე. წ. საპრეზიდენტო არჩევნებისთვის ვითარება სულ უფრო იძაბება და დე-ფაქტო ხელისუფლება ცდილობს, საქართველოს მოსახლეობის გამოყენებას. ამისთვის იკეტება გზები და ხორციელდება მათზე ზეწოლა.
"ძალოვანმა უწყებებმა შეიმუშაონ მექანიზმი, რომელიც უზრუნველყოფს საქართველოს მოქალაქეების დაცვას", _ აცხადებსდავითაია.
დავითაიას მოსაზრებას პარლამენტის თავმჯდომარეც იზიარებს. ბაქრაძემ პარლამენტის საორგანიზაციო დეპარტამენტს დაავალა, შესაბამისი განაცხადით მიმართოს ძალოვან უწყებებს.
"ხელისუფლებამ მაქსიმალურად ფრთხილად უნდა იმოქმედოს ამ საკითხთან დაკავშირებით, რადგან ზედმეტმა ნაბიჯებმა, შესაძლოა, შექმნას დამატებითი პრობლემები. თუმცა, რა თქმა უნდა, ხელისუფლებამ საკუთარი მოქალაქეების დაცვაც უნდა უზრუნველყოს", - აცხადებს ბაქრაძე.