კავკასიის გარემოსდაცვითი არასამთავრობო ორგანიზაციების ქსელმა (CENN) და ღია გარემოსდაცვითი სამოქალაქო ინიციატივამ (OECI) გურჯაანში მწვანე ნარგავების გაჩეხასთან დაკავშირებით სპეციალური განცხადება გაავრცელეს. კავკასიის გარემოსდაცვითი არასამთავრობო ორგანიზაციების ქსელი გურჯაანის მუნიციპალიტეტის გამგეობაში არსებულ დასკვნას ხეებისგან მოსალოდნელი საშიშროების შესახებ არადამაჯერებლად მიიჩნევს და ხეების გაჩეხვის პროცესის დაუყოვნებლივ შეჩერებას ითხოვს. ამის შესახებ "ჯი-ეიჩ-ენს" კახეთის საიმფორმაციო ცენტრიდან აცნობეს.
მათი ინფორმაციით, გურჯაანში, რუსთაველის, ვაჟა ფშაველას და ნონეშვილის ქუჩებზე ნაძვის ხეები მასობრივად გაჩეხეს. გურჯაანის მუნიციპალიტეტის გამგებლის მოადგილის შოთა უტიაშვილის განცხადებით, ხეების მოჭრის შესახებ გადაწყვეტილება გამგეობის კომისიამ მიიღო. მიზეზი - სტიქიის შემთხვევაში ნაძვის ხეების მოგლეჯვის საფრთხეა, რამაც, აღნიშნული კომისიის აზრით, შეიძლება მსხვერპლიც გამოიწვიოს.
როგორც გამგებლის მოადგილემ ღია გარემოსდაცვით სამოქალაქო ინიციატივას განუცხადა, გადაწყვეტილება გარემოს დაცვის სამინისტროსთან არის შეთანხმებული, ხის მასალა კი გურჯაანში მშენებარე ეკლესიას მოხმარდება.
"მოქალაქეებმა მოგვმართეს განცხადებებით, რომელიც გამგეობაში შექმნილმა კომისიამ განიხილა და დააკმაყოფილა, რადგან გადავარდნის შემთხვევაში, შესაძლოა, საშიშროება შეუქმნას ადამიანებს, ან სახლს დაეცეს. ყველა ხეზე შექმნილია აქტები, თუ რატომ მოიჭრა", - აღნიშნა შოთა უტიაშვილმა.
აღნიშნულ ფაქტთან დაკავშირებით, კავკასიის გარემოსდაცვითი არასამთავრობო ორგანიზაციების ქსელი გურჯაანის მუნიციპალიტეტის გამგებელს, გიორგი ჩივიაშვილს დაუკავშირდა. "საუბარია 40-50 წლის 15-იდან 20 ხემდე, რაც მოიჭრა და კიდევ 40 ხემდე, რომელიც მოსაჭრელადაა მონიშნული. კომისიაში, რომელმაც ხეების მოჭრის საჭიროება დააყენა, გარემოს დაცვისა და ბუნებრივი რესურსების სამინისტროს წარმომადგენელიც იყო ჩართული. საკითხით დაინტერესების მიზეზი კი მოსახლეობის განცხადება გახდა", - განაცხადა გიორგი ჩივიაშვილმა. გამგებლის ინფორმაციით, განცხადებას იმ საფრთხის შესახებ, რასაც ეს ხეები მოსახლეობას უქმნიდნენ, 400-მდე გურჯაანელი აწერს ხელს.
ჩENN-მა შეფასებისთვის დარგის სპეციალისტებს მიმართა და მოსაჭრელად დანომრილი ხეების ფოტოები გადაუგზავნა. დამოუკიდებელი ექსპერტები ხეების მდგომარეობას და "მათგან მოსალოდნელ საფრთხეებს" განსხვავებულად აფასებენ.
მეტყევე-ბონატიკოსი გიორგი არაბული აცხადებს, რომ "სურათზე გამოსახული ნაძვის ინდივიდები ვიზუალურად დაახლოებით 40-50 წლის ასაკისაა, ხეებს გარეგნულად არ აღენიშნება რაიმე პათოლოგიური დაავადება და ხმობის ნიშნები. ისინი სრულიად ჯანმრთელი ინდივიდებია, რაც იმაზე მიუთითებს, რომ არსებული გარემოპირობები მათი ზრდა-განვითარებისათვის ოპტიმალურია. შესაბამისად, ისინი ბუნებრივი კატასტროფული მოვლენების მიმართაც (ქარი, თოვლი) მნიშვნელოვანი მდგრადობით გამოირჩევიან. ერთმნიშვნელოვნად შეიძლება ითქვას, რომ ბუნებრივი კატასტროფების შედეგად, ამ ტიპის ხეების წაქცევა და რაიმე უარყოფითი მოვლენების გამოწვევის ალბათობა მინიმალურია".
რაც შეეხება ოფიციალურ მონაცემებს, ბოლო 5 წლის განმავლობაში, ძლიერი ქარის ან სხვა სტიქიური მოვლენის დროს გურჯაანში არც ერთი ნაძვის ხე არ მოგლეჯილა.
სპეციალისტების განცხადებით, გურჯაანის გამგეობაში გაკეთებულ დასკვნას სერიოზულად თუ მივიღებთ, მაშინ საქართველოს ყველა ქალაქში და მათ შორის თბილისში, ხეების აბსოლუტური უმრავლესობა გასაკაფი იქნება.
გამგეობის არაკომპეტენტურობას კარგად გამოხატავს თბილისის გამწვანების სამუშაოების მიმართ მათი გაკვირვებაც. "წერეთლის გამზირზე ჭადრებს რომ ბელავენ, ეს რატომ არავის არ უკვირს", - კითხულობენ გურჯაანის გამგეობაში.
საეჭვოა გამგებლის მიერ მოყვანილი ციფრებიც იმის შესახებ, რომ 40-50 ხე 400 ადამიანს და მათ ოჯახებს საფრთხეს უქმნის.
OECI-ის წარმომადგენლები იმ ოჯახებს დაუკავშირდნენ, რომელთა საცხოვრებელი სახლების წინაც ხეები მოიჭრა. როგორც ირკვევა, მათ გამგეობისთვის განცხადებით არ მიუმართავთ. მათი თქმით, გამგეობიდან ხეების მოჭრამდე ადგილზე არც არავინ მისულა, რომ გადაემოწმებინათ, ხე საფრთხეს ნამდვილად ქმნიდა თუ არა.
კახეთის საინფორმაციო ცენტრმა ისიც გაარკვია, რომ მოჭრილი ნაძვის ხეების მორები გურჯაანში, 9 აპრილის ქუჩაზე მდებარე სახერხ საამქროშია მოთავსებული. სახერხის მფლობელ ინდმეწარმესთან დაკავშირება ვერ მოხერხდა, საამქროში კი გაირკვა, რომ ნაძვის ხეების გაჩეხვით საზოგადოების დაინტერესების შემდეგ, აღნიშნული პირი გამგეობაში დაიბარეს.
სახერხი საამქროს დურგლის გივი გულიაშვილის განმარტებით, ნაძვის ხის მორები მშენებარე ეკლესიისთვის იხერხება, ხარაჩოს ასაგებად.
გურჯაანი-ველისციხის ეპისკოპოსის მეუფე ექვთიმეს განცხადებით, ეპარქია ამის შესახებ არანაირ ინფორმაციას არ ფლობს. ინფორმაციას არ ფლობს გარემოს დაცვისა და ბუნებრივი რესურსების სამინისტროც, რომელსაც მუნიციპალიტეტის გამგებელი კომისიის დასკვნის თანაავტორად მოიხსენიებს.
ქალაქ გურჯაანში ნაძვების მასობრივად ჩეხის ფაქტზე "ადამიანის უფლებათა ცენტრმა" საჩივრით საქართველოს პროკურატურას მიმართა და გამოძიების დაწყება მოითხოვა.
ღია გარემოსდაცვითი სამოქალაქო ინიციატივა და კავკასიის გარემოსდაცვითი არასამთავრობო ორგანიზაციების ქსელი გურჯაანის მუნიციპალიტეტის გამგეობაში არსებულ დასკვნას ხეებისგან მოსალოდნელი საშიშროების შესახებ არადამაჯერებლად მიიჩნევს და ხეების გაჩეხის პროცესის დაუყოვნებლივ შეჩერებას ითხოვს. თუკი გურჯაანის მუნიციპალიტეტის გამგეობა გადაწყვეტილების მიზანშეწონილობის დასაბუთებისთვის თანამშრომლობის სურვილს გამოთქვამს, ინიციატივა მზადაა, სიტუაციის შესაფასებლად დამოუკიდებელი ექსპერტების ადგილზე ჩაყვანა უზრუნველყოს.