"ქრისტიან-დემოკრატები" პარლამენტს დეზერტირობაში ბრალდებული ნადიმ ცერცვაძის ბედით დაინტერესებისკენ მოუწოდებენ. ამის შესახებ განცხადება დღეს სესიაზე "ქრისტიან-დემოკრატების" წარმომადგენელმა ნიკა ლალიაშვილმა გააკეთა.
როგორც ლალიაშვილმა განაცხადა, 30 წლის ნადიმ ცერცვაძე გლდანის ციხის საავადმყოფოში წუხელ გეგუთის კოლონიიდან გადაიყვანეს. მისივე ინფორმაციით, პატიმრის ჯანმრთელობა კრიტიკულად მძიმეა.
მისი თქმით, ეს პირი ციხეში სრულიად ჯანმრთელი შევიდა ახლა კი წელს ქვემოთ არის მოწყვეტილი და სერიოზული მკურნალობა სჭირდება.
ლალიაშვილი დეპუტატებს მოუწოდებს რომ ამ ადამიანის ბედით დაინტერესდნენ და მისი საქალაქო საავადმყოფოში გადაყვანა მოხდეს. მისივე თქმით, ეს ადამიანის დეზერტირობაში უსაფუძვლოდ არის ბრალდებული და მიიჩნევს, რომ დეპუტატებმა აქტიურობა უნდა გამოიჩინონ, რათა საკითხი გაირკვეს.
როგოც ლალიაშვილი აღნიშნავს, ნადიმ ცერცვაძე 2008 წლის აგვისტოში ცხინვალის მისადგომებთან იბრძოდა, ომის დამთავრების შემდეგ კი ბაზაზე მხოლოდ იმიტომ ვერ გამოცხადდა რომ მისი მეუღლე მშობიარობდა. მიუხედავად ამისა, ლალიაშვილის თქმით, იგი დეზერტიტრობაშია ბრალდებული და 5- წლიანი პატიმრობა აქვს მისჯილი.
