როგორც "ჯი-ეიჩ-ენს" სასჯელაღსრულების, პრობაციისა და იურიდიული დახმარების სამინისტროდან აცნობეს, მუდმივმოქმედმა კომისიამ 133 მსჯავრდებულის შუამდგომლობა პირობით ვადამდე გათავისუფლების თაობაზე გუშინ განიხილა, თუმცა მათგან დადებითად მხოლოდ 16 პატიმრის საქმე გადაწყვიტა.

"დანარჩენ მსჯავრდებულებთან დაკავშირებით კომისიამ ჩათვალა, რომ ამ ეტაპზე სასჯელმა ვერ მიაღწია თავის მიზანს და მათ შესაძლებლობა ექნებათ 6 თვეში კვლავ მიმართონ კომისიას. კომისიამ გამჭვირვალედ და ორი მთავარი პრინციპის - პატიმართა უფლებებისა და საზოგადოების უსაფრთხოების დაცვის გათვალისწინებით იმუშავა", - აცხადებენ კალმახელიძის სამინისტროში.