შეერთებული შტატების ყოფილი სახელმწიფო მდივანი და აშშ-ის 2016 წლის საპრეზიდენტო არჩევნებში დონალდ ტრამპის მთავარი კონკურენტი ჰილარი კლინტონი ტრამპს პუტინის მარიონეტს უწოდებს. ამის შესახებ კლინტონი მიკრობლოგ "ტვიტერზე" წერს.
"პუტინის მარიონეტი ისევ აქ არის და რუსეთს დახმარებას სათავისოდ იყენებს. მან კარგად იცის, რომ პუტინის დახმარების გარეშე ვერ გაიმარჯვებს. ჩვენ ეს არ უნდა დავუშვათ, ეს არ უნდა მოხდეს", - დაწერა ჰილარი კლინტონმა.
ჰილარი კლინტონი ამ განცხადებით ეხმაურება ამერიკულ მედიაში გავრცლებულ ცნობებს იმასთან დაკავშირებით, რომ რუსეთი 2020 წლის არჩევნებში ჩასარევად ემზადება.
გავლენიანი ამერიკული გამოცემები The New York Times-ი, The Washington Post-ი და Associated Press-ი იუწყებიან, რომ აშშ-ის დაზვერვის თანამშრომელმა დახურული შეხვედრა გამართა კონგრესის დაზვერვის კომიტეტში, სადაც კონგრესმენებს აცნობა, რომ რუსეთი ერევა საპრეზიდენტო არჩევნებში, რათა ხელი შეუწყოს ტრამპის ხელახალ არჩევას.
პრეზიდენტი დონალდ ტრამპი მიკრობლოგ "ტვიტერზე" გამოეხმაურა ამ ინფორმაციას და მას მორიგი დეზინფორმაციის კამპანია უწოდა.