ევროკავშირის სამიტზე, რომელიც ბრიუსელში გუშინ, 17 ოქტომბერს გაიხსნა და დღეს დაიხურება, ლიდერები ვერ შეთანხმდნენ ჩრდილოეთ მაკედონიისა და ალბანეთის ევროგაერთიანებაშო გაწევრების მოლაპარაკებების დაწყებასთან დაკავშირებით.
როგორც Euronews-ი წერს, ბალკანურ ქვეყნების გაწევრების მოლაპარაკებების დაწყების წინააღდეგ საფრანგეთის პრეზიდენტი ემანუელ მაკრონი და დანიისა და ნიდერლანდების ლიდერები წავიდნენ.
საფრანგეთის პრეზიდენტის ემანუელ მაკრონის განცხადებით, ამჟამად ევროკავშირის წინაშე ძალიან ბევრი გამოწვევა არსებობს, მათ შორის, ბრექსიტი, რუსული საფრთხე, მიგრაცია და ა.შ.
მისი თქმით, ამ ეტაპზე, უმჯობესია ევროკომისიამ გააგრძელოს ალბანეთისა და ჩრდილოეთ მაკედონიის რეფორმირების პროცესის მხარდაჭერა.
ევროკავშირის გაფართოებისა და სამეზობლო პოლიტიკის საკითხებში ევროკომისარმა იოჰანეს ჰანმა განაცხადა, რომ ევროკავშირის ლიდერებმა ბრიუსელის სამიტზე "ვერ შეასრულეს თავიანთი ვალდებულება", დაეწყოთ მოლაპარაკებები სკოპიესა და ტირანასთან.
"ეს უკიდურესად სამწუხაროა. ახლა, წევრმა ქვეყნებმა უნდა აგვიხსნან რამდენად სერიოზულია მათი ერთგულება დასავლეთ ბალკანეთის ევროინტეგრაციის საქმეში", - დაწერა ჰანმა Twitter- ზე.
მან აღნიშნა, რომ ორივე ქვეყნის მიერ მიღწეული პროგრესის მიღებაზე უარის თქმას უარყოფითი შედეგები მოჰყვება, მათ შორის, დასავლეთ ბალკანეთში დესტაბილიზაციის რისკი.
"ახლა ჩვენ ვალდებული ვართ მხარი დავუჭიროთ იმ ქვეყნებს, რომელთა მოქალაქეებიც იმედგაცრუებულნი არიან. დასავლეთ ბალკანეთის ინტეგრაცია ევროკავშირში არის და დარჩება ჩვენს საერთო ინტერესებში", - დასძინა ევროკომისარმა.
გაწევრიანების შესახებ მოლაპარაკების დაწყებას მხარს უჭერდა გერმანიის კანცლერი ანგელა მერკელი. ასევე, პოლონეთი, უნგრეთი, ჩეხეთი და სლოვაკეთი.
ჟან-კლოდ იუნკერმა, ევროკომისიის ამჟამინდელმა ხელმძღვანელმა, აღნიშნულ გადაწყვეტილებას ისტორიული შეცდომა უწოდა.
ჩრდილოეთ მაკედონია და ალბანეთი ევროკავშირის კანდიდატი ქვეყნები 2005 და 2014 წლებში გახდნენ.