აშშ-ში, ნიუ-იორკის შტატში არომატიზებული ელექტროსიგარეტების გაყიდვა აიკრძალა. ამის შესახებ მიკრობლოგ "ტვიტერზე" დაწერა შტატის გუბერნატორმა ენდიურ კუომომ.
"დღეს, ძალაში შევა საგანგებო აღმასრულებელი აქტი არომატული ელექტროსიგარეტების გაყიდვის აკრძალვის შესახებ", - დაწერა გუბერნატორმა "ტვიტერზე".
მისივე თქმით, პოლიცია და ჯანდაცვის დეპარტამენტი გააძლიერებენ ზომებს საცალო ვაჭრობის ობიექტები წინააღმდეგ, რომლებიც არასრულწლოვნებს ელექტროსიგარეტს მიჰყიდიან.
ამასთან, შტატის ხელისუფლება შეიმუშავებს კანონპროექტს, რომელიც შეზღუდავს მარკეტინგულ აქტივობებს, რაც ახალგაზრდების მიერ ელექტროსიგარეტის შეძენის სტიმულირებისკენ არის მიმართული.
მანამდე, არომატული ელექტროსიგარეტების გაყიდვა მიჩიგანის შტატშიც აიკრძალა.
შეგახსენებთ, ცოტა ხნის გავრცელდა ინფორმაცია, რომ ტრამპის ადმინისტრაცია გეგმავს არომატიზებული ელექტროსიგარეტების ამკრძალავი ფედერალური კანონის შემუშავებას.
გასულ თვეში, ილინოისის შტატში საავადმყოფოში გარდაიცვალა მამაკაცი, რომლის გარდაცვალების მიზეზი შესაძლოა ელექტროსიგარეტი ყოფილიყო.
აშშ-ის დაავადებათა კონტროლის ცენტრის ინფორმაციით, გაზრდილია ელექტრონული სიგარეტის გამოყენების შემდეგ რესპირატორული დაავადებების სიმპტომების მქონე ადამიანების ჰოსპიტალიზება.
მათივე განცხადებით, ისინი აკვირდებიან 193 შემთხვევას, რომელიც 28 ივნისიდან აგვისტოს ჩათვლით მოხდა. 193-ვე პაციენტი ელექტრონული სიგარეტის მომხმარებელია.
ოფიციალური ორგანოები თავს იკავებენ იმის მტკიცებისგან, რომ დაავადებების გამომწვევი მიზეზი ელექტრონული სიგარეტია, თუმცა ვარაუდობენ, რომ დიდი ალბათობით, ეს შეიძლება იყოს სპეციალური სითხე, რომელიც გამოიყენება ელექტორნულ სიგარეტში.
როგორც დაავადებათა კონტროლი აცხადებდა, ყველა პაციენტს მსგავსი სიმპტომები აღენიშნებოდა, სუნთქვის გაძნელება, ქოშინი, ტკივილი გულ-მკერდის არეში. ზოგიერთ შემთხვევაში კი დიარეა და ღებინება.