19-22 ივნისს საქართველო მართლმადიდებლობის საპარლამენტთაშორისო ასამბლეის (IAO) 26-ე გენერალურ ასამბლეის სესიას უმასპინძლებს. ღონისძიების ფარგლებში თბილისს 25-მდე ქვეყნის დელეგაციის 100-მდე მონაწილე ეწვევა. ინფორმაციას პარლამენტის პრესსამსახური ავრცელებს.
მართლმადიდებლობის საპარლამენტთაშორისო ასამბლეის (IAO) 26-ე გენერალური ასამბლეის სესია, 19 ივნისს, 19:00 საათზე, სახელმწიფო ცერემონიების სასახლეში საინაუგურაციო სხდომით გაიხსნება.
მართლმადიდებლობის საპარლამენტთაშორისო ასამბლეის საინაუგურაციო სხდომას მისასალმებელი სიტყვით საქართველოს პარლამენტის თავმჯდომარე ირაკლი კობახიძე გახსნის.
ფორუმის მონაწილეებს სრულიად საქართველოს კათალიკოს-პატრიარქის, უწმინდესი და უნეტარესი ილია მეორის მიმართვას საპატრიარქოს ტახტის მოსაყდრე, მიტროპოლიტი შიო გააცნობს.
ასამბლეის პარალელურად 19 ივნისს სახელმწიფო ცერემონიების სასახლეში გაიმართება გამოფენა „აღდგომა იესო ქრისტესი". გამოფენაზე წარმოდგენილი იქნება სამოცდასამი ნამუშევარი, რომელიც ხატწერის საერთაშორისო კონკურსის ექსპერტებისაგან შემდგარმა ჟიურიმ შეარჩია.
ექსპონატები თანამედროვე ხელოვნების სახვითი ხერხებითაა შექმნილი, რომლებიც ბიზანტიურ ხატწერაში დამკვიდრებული ფორმებითა და სტილითაა შთაგონებული და მათვე ეფუძნება.
მართლმადიდებლობის საპარლამენტთაშორისო ასამბლეამ გამოფენა ათენიდან სპეციალურად თბილისის ფორუმისთვის ჩამოიტანა. გამოფენაზე ოთხი ქართველი ხატმწერის ნამუშევრებიც იქნება წარმოდგენილი.
25 ივნისიდან, ერთი თვის განმავლობაში, ნებისმიერ მსურველს გამოფენის დათვალიერების საშუალება სიმონ ჯანაშიას სახელობის ეროვნულ მუზეუმში ექნება. ასამბლეის მონაწილეთათვის საქართველოს პარლამენტის თავმჯდომარის, ირაკლი კობახიძის სახელით საზეიმო მიღება გაიმართება.
ასამბლეის (IAO) სხდომები 20-21 ივნისს საქართველოს პარლამენტის პლენარულ სხდომათა დარბაზში ჩატარდება. ვიზიტის ფარგლებში მართლმადიდებლობის საპარლამენტთაშორისო ასამბლეის
(IAO) დელეგაციის წევრები შეხვდებიან სრულიად საქართველოს კათალიკოსპატრიარქს, უწმინდესსა და უნეტარეს, ილია მეორეს.
სესიაში მონაწილეობს რუსეთის დუმის დელეგაციაც. სესიის გახსნამდე ოპოზიციურმა პარტიებმა განაცხადეს, რომ დელეგაციის ერთ-ერთ წევრს, სერგეი გავრილოვს დარღვეული აქვს კანონი ოკუპირებული ტერიტორიების შესახებ და ის საქართველოში არ უნდა შემოუშვან.