საქართველოს ეკონომიკისა და მდგრადი განვითარების სამინისტროს წიაღის ეროვნულმა სააგენტომ წალკის მუნიციპალიტეტში, სოფელ ხაჩკოის მიმდებარე ტერიტორიაზე, სასარგებლო წიაღისეულის - „ხაჩკოის“ ოქრო-სპილენძ-პოლიმეტალების შესწავლა-მოპოვებაზე ელექტრონული აუქციონი გამოაცხადა.
აუციონის პირობების თანახმად, გამარჯვებულმა ლიცენზიის ძალაში შესვლიდან არაუმეტეს 3 სამი წლის ვადაში უნდა უზრუნველყოს სასარგებლო წიაღისეულის რესურსის შესწავლა. სამი წლის განმავლობაში სამუშაოების ჩატარების მიზნით, განახორციელოს არანაკლებ 2 000 000 (ორი მილიონი) ლარის ოდენობის ინვესტიცია; ასევე, ლიცენზიის გაცემიდან 1 წლის შემდეგ, ლიცენზიის მოქმედების მთელ პერიოდში უზრუნველყოს მუდმივად არანაკლებ საქართველოს 30 (ოცდაათი) მოქალაქის დასაქმება;
აუქციონის პირობებში, ასევე, წერია, რომ ლიცენზიის მფლობელმა, არ უნდა დააზიანოს შიდა სასოფლო გზები. დაზიანების შემთხვევაში მოახდინოს მისი აღდგენა-რეაბილიტაცია.
ექსპლუატაციის დროს მეწყრული პროცესების გააქტიურებისას (ასეთის არსებობის შემთხვევაში) უნდა მოხდეს სამუშაოების შეჩერება, სათანადო ღონისძიებების დაგეგმვა და განხორციელება.
საქსტატის მონაცემებით, 2018 წელს დაუმუშავებელი ან ნახევრადდამუშავებული ოქროს ექსპორტმა 69 მლნ 809 ათას 600 დოლარი შეადგინა, რაც მთლიანი ექსპორტის 2.1%-ია. აღსანიშნავია, რომ 2018 წელს 2017 წელთან შედარებით ოქროს ექსპორტი (ღირებულებით ნაწილში) 1.4%-ით შემცირდა. 2017 წლის მაჩვენებლებით, ქვეყნიდან 70 მლნ 771 ათას 200 დოლარის ღირებულების ოქრო გავიდა.