საპარლამენტო უმრავლესობის წევრი გიორგი კახიანი აცხადებს, რომ მსახიობისა და ბიზნესმენის ლევან ჯიბღაშვილის გათავისუფლების შესახებ გადაწყვეტილება სასამართლომ მიიღო და სასამართლომ თავად უნდა ახსნას, რატომ მიიღო ასეთი გადაწყვეტილება.
„ეს მავნე პრაქტიკა, რომელიც ადრე არსებობდა, რა თქმა უნდა, ჩვენ ყოველთვის ამის წინააღმდეგ ვიბრძვით. თუ რაიმე ისეთი შემთხვევები არის, რამაც შეიძლება მსგავსი კითხვები გააჩინოს, ამ კონკრეტულ შემთხვევებზე უნდა ვისაუბროთ და ამ კონკრეტულ შემთხვევებს მეტი პასუხი გაეცეთ. ეს არის სასამართლოს გადაწყვეტილება. სასამართლომ მიიღო ეს გადაწყვეტილება და სასამართლომ თავად უნდა ახსნას, რატომ მიიღო ასეთი გადაწყვეტილება. როგორც ჩანს, სასამართლოს გადაწყვეტილებიდან გამომდინარე, პატიმრობაში პირის დატოვება მან არ ჩათვალა მიზანშეწონილად და ამაში ცუდს ვერაფერს ვხედავ“, - განაცხადა გიორგი კახიანმა.
სასამართლომ მსახიობი და ბიზნესმენი ლევან ჯიბღაშვილი 10-ათასლარიანი გირაოს სანაცვლოდ 23 აპრილს გაათავისუფლა. ნარკოდანაშაულის ბრალდებით, ლევან ჯიბღაშვილი 22 აპრილს დააკავეს. გამოძიების ინფორმაციით, მსახიობის ავტომობილიდან ჩხრეკის შედეგად ნარკოტიკული საშუალებები ამოიღეს.
ჯიბღაშვილს ბრალად ედება სისხლის სამართლის კოდექსის 260-ე მუხლის პირველი და მე-3 ნაწილით გათვალისწინებული დანაშაულები. წარდგენილი ბრალი 5-დან 8 წლამდე თავისუფლების აღკვეთას ითვალისწინებს.
ხელისუფლების ოპონენტები შერჩევით სამართალზე ლაპარაკობენ. მათი თქმით, სხვა შემთხვევებში, როდესაც მცირე რაოდენობის ნარკოტიკზეა ხოლმე საუბარი, სასამართლო ამა თუ იმ პირს წინასწარ პატიმრობას უფარდებს.