მეორე დღეა მთავრობის ადმინისტრაციასთან 100-მდე ელექტრომობილის მეპატრონე აქციას მართავს. ისინი ბათუმიდან სპეციალურად ჩამოვიდნენ და პრემიერ-მინისტრთან შეხვედრას ითხოვენ. ადმინისტრაციასთან კარვებია გაშლილი. აქციის მონაწილეებმა მთელი ღამე კარვებში გაათენეს
აქციის მონაწილეები ბათუმის საკრებულოს 5 მარტის დადგენილებას აპროტესტებენ, რომლის მიხედვითაც მათ ბულვარში ელექტრომობილებით ტურისტების მომსახურება აეკრძალათ. ეს გადაწყვეტილება ადგილობრივი მმართველობის მიერ ბულვარის ადმინისტრაციის მოთხოვნის საფუძველზე მიიღეს.
ელექტრომობილების მეპატრონეები ნებართვის გაცემას ითხოვენ, რომლის მიხედვითაც 300-მდე ელექტრომობილი 10-კილომეტრიან ბულვარში ტურისტების მომსახურებას შეძლებს.
„აჭარის მთავრობას არ შეუძლია გადაწყვიტოს ჩვენი პრობლემა. ერთპიროვნულად გადაწყვიტეს, აგვიკრძალეს, არ გაითვალისწინეს ჩვენი მდგომარეობა, ჩვენი ოჯახური მდგომარეობა, ჩვენი სამსახურეობრივი მდგომარეობა. სხვა სამსახური, სხვა შემოსავალი თითქმის არცერთ არ აქვს, ამათზე ვართ დამოკიდებული,“- აცხადებს აქციის ერთ-ერთი მონაწილე გიორგი ჩხაიძე.
აქციის მონაწილეები ამბობენ, რომ პროტესტი პერმანენტულ ხასიათს მიიღებს თუ მათი მოთხოვნა არ დაკმაყოფილდება. მათივე განცხადებით, დღეს აქციას ბათუმიდან რამდენიმე ათეული ადამიანი შეუერთდება.