ინდოეთში, ქაშმირის რეგიონში თვითმკვლელი ტერორისტის თავდასხმას 44 ადამიანი ემსხვერპლა. ინფორმაციას Reuters-ი ავრცელებს.
სამხედრო კოლონაში ერთ-ერთ ავტობუსს დანაღმული ავტომობილი შეეჯახა, რომელსაც თვითმკვლელი ტერორისტი მართავდა. შეჯახებამ აფეთქება გამოიწვია. სააგენტოს ცნობით, კოლონა 78 ავტომობილსგან შედგებოდა, რომელსაც პოლიციის 2 547 თანამშრომელი გადაყავდა.
თავდასხმაზე პასუხისმგებლობა პაკისტანურმა ისლამისტურმა დაჯგუფებამ „ჯაიშ-ე-მუჰამედმა“ აიღო.
„ჯაიშ ე მუჰამადი“ („წინასწარმეტყევლ მუჰამედის არმია“) ჯამუ და ქაშმირის შტატში ერთ-ერთი აქტიურად მოქმედი სეპარატისტული დაჯგუფებაა, რომელიც შტატის დამოუკიდებლობისა და პაკისტანთან შეერთებისთვის იბრძვის.
ქაშმირში ინდოეთსა და პაკისტანს შორის არ არის ოფიციალური საზღვარი, ორი ქვეყნის არმიას კონტროლის ხაზი ყოფს. ნიუ დელი პაკისტანის ხელისუფლებას სეპარატისტების მხარდაჭერაში ადანაშაულებს, ისლამაბადი ბრალდებას უარყოფს და აცხადებს, რომ ქაშმირის მოსახლეობა თავიანთი უფლებებისთვის დამოუკიდებლად იბრძვის.