დიდი დიღმის პოლიციაში სამშენებლო კომპანია „ელ ჯგუფის“ დირექტორის გამოკითხვა რამდენიმე წუთის წინ დასრულდა. განყოფილებაში იმყოფებოდა გიორგი ჭანტურიას ადვოკატიც. ჭანტურიას უფლებადამცველი ალექსანდრე კობაიძე აცხადებს, რომ სავარაუდოდ, პოლიციის მიზანი დანაშაულის კომპანია „ელ ჯგუფზე“ გადაბრალებაა.
უფლებადამცველი არ გამორიცხავს, რომ გიორგი ჭანტურია დააკავონ. მისი თქმით, ჭანტურიას ბრალეულობა საქმეში არ იკვეთება.
„დარწმუნებული ვარ, რომ ეს არ მოხდება იმიტომ, რომ სამართლებრივად, წარმოუდგენელია, რომ გრიგოლ ჭანტურიას ბრალეულობა გამოიკვეთოს. ორჯერ ოფიციალურად 112-ში განხორციელდა ზარი, რომ იყო იქ გაზის მძაფრი სუნი, თუმცა ამაზე რეაგირება არ მოახდინა „ყაზტრანსგაზმა“, რომლის პასუხისმგებლობაა და ვალდებული იყო, რომ უსაფრთხოების ნორმები დაეცვა და არ დაიცვა. ექსპლუატაციას რაც შეეხება, განვმეორდები, რომ თბილისში 90% არ არის არც ერთი კორპუსი ჩაბარებული, ანუ ექსპლუატაციაში შესული“, - აცხადებს ალექსანდრე კობაიძე.
აფეთქება დიდ დიღომში, ავთანდილის ქუჩაზე, 16 აინვარს 20:30 საათზე მოხდა. აფეთქებას 4 ადამიანის სიცოცხლე ემსხვერპლა, მათ შორის, ერთი არასრულწლოვნი. დაშავებულია 8 ადამიანი, ისინი სასწრაფო სამედიცინო დახმარების ბრიგადებმა კლინიკებში გადაიყვანეს. არსებული ინფორმაციით, აფეთქება სავარაუდოდ გაზის გაჟონვის გამო ერთ-ერთი საცხოვრებელი კორპუსის მეექვსე სართულზე მოხდა. კორსპუსის მცხოვრებლების თქმით, მთელი დღის განმავლობაში გაზის სუნი იგრძნობოდა, რის გამოც მათ "ყაზტრანსგაზის“ წარმომადგენლები გამოიძახეს. ისინი ამბობენ, რომ გავრცელებული ინფორმაციით, ყაზტრანსგაზის თანამშრომლებმა პრობლემა ვერ აღმოაჩინეს.
შინაგან საქმეთა სამინისტროს ინფორმაციით, შსს-ის თბილისის პოლიციის დეპარტამენტის მიერ დიდ დიღომში, საცხოვრებელ კორპუსში მომხდარ აფეთქებასთან დაკავშირებით გამოძიება სსკ-ის 240-ე პრიმა მუხლის მე-3 ნაწილით დაიწყო, რაც მშენებლობის ან ექსპლუატაციის დროს უსაფრთხოების წესების დარღვევას გულისხმობს, რომელსაც ორი ან მეტი ადამიანის სიცოცხლის მოსპობა მოჰყვა.