აშშ-ის კონგრესის წარმომადგენელთა პალატის სპიკერი ნენსი პელოსი აშშ-ის პრეზიდენტს დონალდ ტრამპს სთავაზობს გადადოს 29 იანვარს კონგრესში დაგეგმილი პრეზიდენტის ყოველწლიური მიმართვა.
ნენსი პელოსის მიერ დონალდ ტრამპისადმი გაგზავნილ წერილში აღნიშნულია, რომ აშშ-ის მთავრობის „შათდაუნის“ გამო დაფინანსების გარეშეა დარჩენილი უსაფრთხოების სამსახური, რის გამოც შესაძლოა სათანადოდ ვერ იქნეს დაცული პრეზიდენტის უსაფრთხოება. ამის გამო პელოსი პრეზიდენტს მიმართვის წერილობით წარდგენას სთავაზობს.
საპასუხოდ უსაფრთხოების სამსახურში განაცხადეს, რომ სრულიად მზად არიან სახელმწიფო უსაფრთხოების დასაცავად და უზრუნველსაყოფად.
აღნიშნულ საკითხთან დაკავშირებით დონალდ ტრამპის პოზიცია ჯერჯერობით ცნობილი არ არის.
შეგახსენებთ, რომ 2018 წლის 22 დეკემბრიდან აშშ-ის მთავრობის მუშაობა ნაწილობრივ დახურულია. დონალდ ტრამპი კონგრესისგან ამერიკა-მექსიკის საზღვარზე კედლის ასაშენებლად დაფინანსებას ითხოვს, დემოკრატები კი პრეზიდენტის ამ მოთხოვნას კატეგორიულად არ ეთანხმებიან.