გამოძიება მიმდინარეობს და გვეცოდინება, რეალურად რა მოხდა, რასთან გვაქვს საქმე, – განაცხადა თბილისის მერმა, კახა კალაძემ დიდ დიღომში მომხდარ აფეთქებასთან დაკავშირებით.
თბილისის მერი იაშვილის კლინიკაში დაშავებული ბავშვების მოსანახულებლად მივიდა.
„მინდა, მივუსამძიმრო ოჯახებს, ახლობლებს, სრულიად საქართველოს. დიდი ტრაგედია დატრიალდა. საავადმყოფოში გადმოყვანილი ბავშვების მდგომარეობა დამაკმაყოფილებელია, მათ სიცოცხლეს საფრთხე არ ემუქრება. თუმცა, ხვალამდე უნდა იყვნენ ექიმების დაკვირვების ქვეშ და გააგრძელებენ მკურნალობას.
პასუხისმგებლობას რაც შეეხება, გამოძიება მიმდინარეობს და გვეცოდინება, რეალურად რა მოხდა, რასთნ გვაქვს საქმე“, – განაცხადა კახა კალაძემ.
აფეთქება დიდ დიღომში, ავთანდილის ქუჩაზე, 16 აინვარს 20:30 საათზე მოხდა. აფეთქებას 4 ადამიანის სიცოცხლე ემსხვერპლა, მათ შორის არასრულწლოვნი. დაშავებულია 6 ადამიანი, ისინი სასწრაფო სამედიცინო დახმარების ბრიგადებმა კლინიკებში გადაიყვანეს. არსებული ინფორმაციით, აფეთქება სავარაუდოდ გაზის გაჟონვის გამო ერთ-ერთი საცხოვრებელი კორპუსის მეექვსე სართულზე მოხდა. კორსპუსის მცხოვრებლების თქმით, მთელი დღის განმავლობაში გაზის სუნი იგრძნობოდა, რის გამოც მათ "ყაზტრანსგაზის“ წარმომადგენლები გამოიძახეს. ისინი ამბობენ, რომ გავრცელებული ინფორმაციით, ყაზტრანსგაზის თანამშრომლებმა პრობლემა ვერ აღმოაჩინეს.
