საოცარად საინტერესო მოვლენის მომსწრე გახდა საქართველოს ტექნიკური უნივერსიტეტის მცირე სააქტო დარბაზი. ამ დღეს სამართლისა და საერთაშორისო ურთიერთობების ფაკულტეტის მულტიდისციპლინური სამეცნიერო თეორიულ-პრაქტიკულ ღონისძიებათა პროექტის "პოლიტიკა სამსჯავროზე" ფარგლებში პირველად გაიმართა პოლიტიკის გასამართლება. ამჯერად, იმიტირებულ სასამართლო პროცესზე გაიტანეს ბაგრატ V-ისა და გიორგი VII-ის მიერ წარმოებული პოლიტიკა. ცნობილია, რომ მათი მეფობის პერიოდში განხორციელდა ჩვენთვის აუნაზღაურებელი დანაკარგების მომტანი თემურლენგის შემოსევები, რაც საბოლოოდ საქართველოსათვის კატასტროფული შედეგით დასრულდა. რამდენად შეესაბამებოდა საქართველოს მაშინდელი ხელისუფლების წარმოებული პოლიტიკა ქვეყნის ეროვნულ ინტერესებს, შეიძლებოდა თუ არა კატასტროფის თავიდან აცილება. განხილული იქნა მხოლოდ და მხოლოდ პოლიტიკა პოლიტოლოგიურ და სამართლებრივ ასპექტში და არა როგორც წარსული ცხოვრება ისტორიული მოვლენა.
ამას წინ უსწრებდა დიდი მუშაობა – სტუდენტებისა და ექსპერტ პროფესორ-მენტორების მიერ წინასწარი პოლიტოლოგიური და სამართლებრივი შესწავლისა და ანალიზის შემდეგ, სტუდენტების მიერ განაწილებულ იქნა მოსამართლის, მბრალმდებელისა და ადვოკატის ფუნქციები. სამეცნიერო კვლევის სხვადასხვა სპეციალობების თეორიულ-პრაქტიკული სინთეზისა და უნივერსალიზაციის პროცესში ჩართული იყო სხვადასხვა უმაღლესი სასწავლებლების სტუდენტები (ბაკალავრები, მაგისტრანტები, დოქტორანტები).
როგორც ფაკულტეტის დეკანმა, პროფესორმა ირაკლი გაბისონიამ აღნიშნა: პროექტი, რომლის ავტორიც გახლავთ პოლიტიკის მეცნიერებათა დოქტორი, პროფესორი ჰენრი კუპრაშვილი, მოწოდებულია სტუდენტებში განავითაროს სათანადო პროფესიული უნარ-ჩვევები, ხელი შეუწყოს მრავალმხრივად განვითარებული, კონკურენტუნარიანი, მაღალი დონის სპეციალისტის მომზადებას. ინოვაცია მოიცავს პოლიტიკის მეცნიერებების, სამართალმცოდნეობის, საერთაშორისო ურთიერთობების, ინფორმატიკისა და სხვ. სამეცნიერო კვლევის სპეციალობების თეორიულ-პრაქტიკულ სინთეზს. ეს არის პოლიტიკის ერთგვარი გაკვეთილები, რათა სტუდენტებმა, მომავალმა სპეციალისტებმა შეცდომებზე ისწავლონ, რათა ისინი აღარ გაიმეორონ.
პოლიტიკის გასამართლებაში, როგორც ჟიურის წევრებმა, პოლიტიკოსებმაც მიიღეს მონაწილეობა. მოწვეულ ჟიურიში სტუ-ს პროფესორების გარდა მონაწილეობდნენ საპარლამენტო ლეგიტიმაციის მქონე პარტიების წარმომადგენლებიც. მათ აღნიშნეს:
კობა ნარჩემაშვილი, პარლამენტის წევრი, საპარლამენტო ფრაქცია „ქართული ოცნება, სოციალ-დემოკრატები საქართველოს განვითარებისათვის“:
ძალიან მნიშვნელოვანი პროექტია. ეს არის იმიტაცია სასამართლო პროცესისა, რომელიც დატვირთულია პოლიტიკური შემადგენელით. აქ არ ეხებიან ვინმეს სისხლის სამართლებრივ პასუხისმგებლობას ან სხვა რაიმე პასუხისმგებლობას, აქ არის საუბარი პოლიტიკოსების მიერ მიღებული გადაწყვეტილებების სისწორეზე, თუ შეიძლება ასე ითქვას და მის ანალიზზე. ჩემთვის ძალიან სასიამოვნო იყო, რომ სტუდენტებმა მაღალი დონე გამოავლინეს, როგორც ისტორიის ასევე სამართლის, როგორც პროცედურული ისე შინაარსობრივი ცოდნის და საბოლოო ჯამში მიმაჩნია, რომ არის ძალიან პერსპექტიული პროექტი და ამ პროექტს აუცილებლად ექნება გაგრძელება.
გიორგი ბარამიძე, პოლიტიკური გაერთიანება „ერთიანი ნაციონალური მოძრაობა“:
მე მინდა მივულოცო საქართველოს ტექნიკურ უნივერსიტეტს, სამართლისა და საერთაშორისო ურთიერთობების ფაკულტეტს, ყველა პედაგოგსა და სტუდენტს ასეთი ლამაზი, ძალიან ჭკვიანური, კარგი ინიციატივა, იმისათვის, რომ, ერთი, გავიხსენოთ ჩვენი ისტორია, კრიტიკულად გავაანალიზოთ და ასევე, რაც მთავარია, რაღაც ახალი მეთოდი მოვძებნოთ, როგორ შეიძლება სხვადასხვა მიღებულ მოსაზრებებთან მიმართებაში კვლავ დავსვათ საინტერესო კითხვები და კრიტიკულად შევხედოთ ჩვენი ქვეყნის ისტორიასაც, ამა თუ იმ პოლიტიკურ მოღვაწესაც და შევეცადოთ, მეტნაკლებად აი ამ ყველაფერმა, ამ ცოდნამ და ასეთმა კრიტიკულმა მიდგომამ დახმარება გაგვიწიოს ჩვენი დღევანდელი სახელმწიფოს მშენებლობაშიც. ფართო გაგებით თუ ვიტყვით, ჩვენ ყველანი ამისთვის ვართ მოწოდებულნი და ეს განათლებაც, ჩვენი განათლებაც მათ შორის, ამ სფეროში არის მნიშვნელოვანი და ძალიან კარგი ინიციატივაა და რომელშიც სიამოვნებით ვიღებ მონაწილეობას და რაც შედგა, ეს პროცესი. პირადად ძალიან ბევრი ახალი ცოდნა მივიღე და ჩემთვის ძალიან სახალისოც იყო და ძალიან შინაარსიანიც. საინტერესო იყო ამდენ კარგ ადამიანთან ურთიერთობა. ვუსურვებ უნივერსიტეტსაც, ფაკულტეტსაც შემდგომ წარმატებებს და იმედია ეს პროექტი გაგრძელდება და სულ უფრო და უფრო მეტ სტუდენტს დააინტერესებს არა მარტო საკუთრივ ეს პროექტი, არამედ ასეთი მიდგომა, რაც ჩვენ დღეს ძალიან გვაკლია საქართველოში, ასე ვთქვათ, გამოცლილი კატეგორიულობისაგან და უფრო კრიტიკული და მიმართული იმისაკენ, რომ მაქსიმალურად შევეცადოთ დადგინდეს ჭეშმარიტება.
ირაკლი კიკნაველიძე, პოლიტიკური გაერთიანება „ევროპული საქართველო–მოძრაობა თავისუფლებისთვის“, პრესსპიკერი:
ძალიან სასიამოვნო იყო ის რაც ჩვენ ვნახეთ, იმიტომ რომ ერთის მხრივ, ვნახეთ თავად სტუდენტების დიდი სურვილი, მათი მონდომება და შემართება, როგორც მოემზადნენ დღევანდელი შეხვედრისათვის, ისე თავად ინტერესიც უნივერსიტეტში, რაც ამ თემამ გამოიწვია, ეს არის ძალიან საინტერესო პროექტი, რომელიც არა მარტო ვიწროდ, კონკრეტულად ამ უნივერსიტეტის აქტიურობას შეუწყობს ხელს, არამედ შეიძლება გახდეს ძალიან მნიშვნელოვანი ნაბიჯი, ზოგადად საქართველოს ისტორიის გადააზრების, ხელახლა შეხვედრის, ხელახალი კვლევისათვის, იმიტომ, რომ სწორედ ამ შეჯიბრებაში, ერთმანეთს შორის შეჯიბრებაში შეიძლება ახალი ძალიან მნიშვნელოვანი დასკვნები გავაკეთოდ.
სტუდენტთა სამსჯავროზე მალე წარდგება: ნოე ჟორდანიას, ერეკლე მეორეს, ლაშა გიორგის, ზვიად გამსახურდიას, ედუარდ შევარდნაძის და სხვათა პოლიტიკა. ინტერესით მოელის საქართველო თუ როგორ შეფასდება სამსჯავროზე სტუდენტების მიერ არა პიროვნებები, არამედ მხოლოდ და მხოლოდ მათი პოლიტიკა პოლიტიკური და სამართლებრივი კუთხით.